Ataýly jylda júzdegen shaqyrym jol jóndeledi

Eń áýeli aıta keterligi, «Jol jy­ly» aıasynda Tarbaǵa­taı aýdany aýma­ǵyndaǵy oblystyq Aqjar – Shilikti tas jo­lynyń 93-108 shaqyrymdary, ıaǵnı Mańyraq pen Bozsha aýyldarynyń arasyndaǵy 15 shaqyrym jolǵa ortasha jóndeý jumystary bastaldy. Bıyl Mańyraq aýylynan bas­tap Bozsha aýylynyń burylysyna deıingi 15 shaqyrym jol asfalttalady. Keler jyly Bozshadan bastap, Saryóleń aýylynyń burylysyna deıingi 15 shaqyrym jol (93-78 km) ortasha jóndeýden ótkizilmek.

Aýdan ákiminiń orynbasary Ta­lant Baqytbekulynyń aıtýynsha, osy jyly Aqjar aýyly men Omby – Maı­qapshaǵaı respýblıkalyq tras­sa­syn jalǵaıtyn 18 shaqyrym jol­dyń ortasha jóndeý jumysy aıaqtaldy.

Sonymen qatar bıyl Aqmektep pen Qarasý aýyldarynyń arasyndaǵy 12 km jolǵa, Aqjar, Tuǵyl, Qabanbaı, Mańyraq, Jetiaral aýyldarynyń kóshelerine asfalt tóseý josparlanyp otyr. Aıtqandaı, Aqmektep pen Bozsha aýyldarynyń kireberis joldaryna da ortasha jóndeý júrgiziledi.

Oblystyń joldaryn taqtaıdaı etý úshin bıylǵy bıýdjetten bólinip jatqan qarajat az emes. Esep-qısapqa qarasaq, bıyl joldar men kópirlerdi salýǵa jáne qaıta jańartýǵa – 3 mlrd teńge bólingen. Jalpy, joldar­dy kútip ustaýǵa 6,2 mlrd teńge qar­jy qarastyrylǵan. Al eldi meken­derdiń joldary men kóshelerin orta­sha jóndeýge 22,3 mlrd teńge bólin­di. Atap aıtsaq, О́skemen qala­syn­da Sátbaev pen Jibek joly dań­ǵyl­darynyń qıylysyndaǵy kólik aıryǵynyń, Permıtın men Slavskıı kósheleriniń qıylysynyń qurylysy jalǵastyryldy. Almaty tas jolyna shyǵatyn Jibek joly jáne Bazovaıa kóshelerin qaıta jańartý jumystary aıaqtalady. Eldi mekenderdiń joldary men kóshelerin ortasha jóndeýge 22,3 mlrd teńge bólinse, onyń ishinde 600 km joldar men kóshelerdi ortasha jóndeý boıynsha 110 jobany iske asyrý josparlanǵan.

Odan bólek, aldaǵy ýaqytqa qoıyl­­ǵan joba-josparlar da jeter­lik. Máselen, Shemonaıha qalasyndaǵy «Ýba» ózeni arqyly ótetin apatty kópirdi qaıta jańartý boıynsha jobalaý jumystary bastaldy. О́skemendegi Qazaqstan kóshesi, Jeńis jáne Slavskıı dańǵyldarynyń tu­syn­da Ertis kópirinen túse beristegi aıryq joldar salý, Vınogradov kóshe­siniń tusynda Ertis ózeni arqyly ótetin kópirdi jobalaý máselesi pysyqtalyp jatyr.

Oblystyq mańyzy bar joldarda 15 nysanda qarqyndy jumys júr­gizilip jatsa, onyń altaýy jalǵa­syn tapqan jóndeý jumystary, toǵy­zy – jańa bastalǵan jumys­tar. Búgin­gi kúni 45 shaqyrym jón­deý jumysy tolyǵymen aıaqtaldy. Olar: Shilikti – Zaısan avtomobıl jolynyń 12 shaqyrymy, Aqjar – Omby – Maıqapshaǵaı jolynyń 18 shaqyrymy, Úlken Naryn – Kúrshim jolynyń 15 shaqyrymy.

– «Jol jyly» aıasynda jumys­tar­dy kúsheıttik. Oblysta 30 shaqy­rym jolǵa ortasha jóndeý jumys­tary aıaqtaldy. Ol degenimiz, Sibe kólderine aparatyn Vasılevka – Bozanbaı jolynyń 15 shaqyrymy, Kúrshim – Qaljyr tas jolynyń 15 shaqyrymy jóndeldi. Qazir 100 shaqyrym jolǵa jóndeý júrgizilip jatyr. Onyń ishinde О́skemen – Tarǵyn – Samar jolynyń 12 shaqyrymy, Shilikti – Aqjar jo­lynyń 30 shaqyrymy, Kúrshim – Qal­jyr – Býrabaı jolynyń 15 shaqy­rymy, Oktıabr ótkeli – Altaıka – No­vo­haırýzovka jolynyń 27 sha­qy­rymy, Novotroıskoe aýylyna kire­beris jolynyń 16 shaqyrymyna jón­deý jumystary bastaldy, – deıdi ob­lys­tyq jolaýshylar kóligi jáne avto­­mobıl joldary basqarmasy bas­­shy­­synyń orynbasary Erlan Ýálıev.

Aýdandyq mańyzy bar joldar men kósheler boıynsha 380 shaqyrym jol men kósheni ortasha jóndeýden ótkizý úshin 95 jobany iske asyrý josparlanǵan. Al qurylys materıaldarynyń sapasyn baqylaýdy «Jol aktıvteri sapasynyń ulttyq ortalyǵy» RMK júzege asyrady. Oblystyq jolaýshylar kóligi jáne avtomobıl joldary basqarmasy basshysynyń orynbasary Erlan Ýálıevtiń málimetinshe, basqarma 80 mln teńge somasyna shart jasasqan; О́skemen qalasynyń ákimdigimen 35 shaqyrym jol jóndeý boıynsha 38 joba iske asyrylyp, 12 shaqyrym jol jóndeldi.

Tizip ótken sıfrly derekterge qarasaq, jyl sońyna deıin Shyǵysta barlyq baǵyttaǵy joldar bolmasa da, birazy jamalady, jóndeledi. Eldi meken ishindegi oıdym joldar da tegisteletin kórinedi. Bul joba úshin bólingen qarjy kólemi keler jyly da qysqarmaı, bıýdjetten qarastyrylsa, buryn-sońdy kúrek tımegen joldar jóndelip, turǵyndar taqtaıdaı jolmen zýlar edi.

Shyǵys Qazaqstan oblysy