Foto: QR Parlamenti májilisiniń baspasóz qyzmeti
Aldymen Shymkenttegi kitaphanaǵa baryp, eńbek ujymymen kezdesti. Kitaphana qyzmetkerleri májilismenge suraqtaryn qoıyp, tıisti jaýaptaryn aldy. Kitaphanashylardyń jalaqylaryn kóterý, eńbek demalystaryn 45 kúnge deıin uzartý syndy tilekterin bildirdi. Májilis depýtaty bul máseleler boıynsha jazbasha túrde ótinish jazý kerektigin aıtyp, óz tarapynan tıisti memlekettik organdarǵa depýtattyq saýal joldaıtynyn jetkizdi.
Májilis depýtaty Asar shaǵyn aýdanynda ornalasqan №90 daryndy balalarǵa arnalǵan mamandyrylǵan mektep-gımnazııasynyń ustazdarymen jáne osy bilim oshaǵynda ashylǵan kadet synyby shákirtterimen kezdesti. Joba boıynsha oqýshylarǵa quqyqtyq bilim men áskerı-patrıottyq tárbıe beriledi. Kadet synybynyń oqýshylary sabaqtan tys ýaqytta sapta júrý, alǵashqy medısınalyq kómek kórsetý, avtomatty buzyp-jınaýdy úırenip, sporttyq jattyǵýlarmen aınalysady.
– Elimizde alǵash bolyp kadet synyby ashylypty. О́te quptarlyq bastama.Osy mektepke arnaıy kelip otyrmyn. Turǵyndarmen kezdesýde aıtylǵan máseleniń bári ulttyq ıdeologııaǵa qatysty. Mádenıet salasy ókilderiniń jalaqysy, zeınetaqy, jer máseleleri kóterilip jatyr. Jalpy, Shymkentte kóptegen oń ózgeris bar, – dedi Q.Isa.
Budan soń depýtat Shymkent qalasy Kókbulaq eldi mekeninde ornalasqan mádenıet úıiniń qurylys barysymen tanysty. Merdiger kompanııa basshylyǵy qurylys jumystary bıyl tamyz aıynda aıaqtalatynyn aıtyp, ýáde berdi.
Sondaı-aq Igilik eldi mekeninde ornalasqan mádenıet úıinde jergilikti turǵyndarmen kezdesti. Q.Isa Májiliste kóterilip júrgen máselelerge keńinen toqtaldy. Turǵyndar №82 mekteptiń ǵımaraty eski ári osy kúnge deıin balalar 3 aýysymda oqıtyny jóninde másele kóterdi. Budan bólek, Qyzyljar eldi mekeninde kóshelerge asfalt tóseý, jaıaý júrginshilerge trotýar salý, qańǵybas ıtter, Badam ózeninen sý shyǵarý, kópqabatty úılerdiń qasbetin jóndeý jaılary da sóz boldy.
