Kollajdy jasaǵan – Qonysbaı ShEJIMBAI, «EQ»
Jalpy alǵanda, oblysta «Taza Qazaqstan» ekologııalyq aksııasy kóktem mezgilinde bastaý alǵan. «Taza ólke», «Kıeli meken», «Jasyl aımaq», «О́negeli urpaq», «Móldir bulaq» sııaqty aptalyqtar joǵary deńgeıde atqaryldy. Degenmen qorshaǵan ortanyń tazalyǵyn saqtaý – bárimizdiń azamattyq boryshymyz. Sondyqtan bul aksııa senbi saıyn júzege asyrylyp jatyr. Osy rette UQK shekara qyzmeti Jetisý oblysy boıynsha departamenti Alakól aýdany aýmaǵyndaǵy shekara basqarmasynyń «Sarqan» shekara bólimine qarasty «Basqan» shekara bólimshesiniń jaýyngerleri bólimshe mańyndaǵy ózen arnalary men jol boıyn qoqystan tazartty.
– Qorshaǵan ortany taza ustaý úshin tazalyq mádenıeti árdaıym joǵary turýy kerek. Ol úshin sana saý bolýǵa tıis. Biz bólimshe mańaıyn únemi tazartyp turamyz. Keıde týrıster, tabıǵat aıasynda demalatyn turǵyndar qorshaǵan ortaǵa qoqysty beıbereket shashyp ketedi. Al bizdiń shekarashylar mundaıǵa jol bermeıdi. Terekti mektebiniń «Shekarashynyń jas dosy» úıirmesine qatysýshylarmen birge tazalyq jumystaryn júrgizemiz, – deıdi «Basqan» shekara bólimshesiniń aǵa tehnıgi Araı Omaruly.
Bólimsheniń 40-tan asa shekarashysy qatysqan is-shara barysynda Basqan ózeniniń jaǵalaýynan qap-qap qatty qaldyqtar shyǵaryldy. Bul mańǵa tabıǵat aıasynda tynyǵýshylar jıi keledi. Aǵa serjant Dáýren Nurmanǵalıev keı turǵynnyń «tilsiz» tabıǵatqa jıi qııanat jasaıtynyna qynjylatynyn jetkizdi.
– Elimizdiń árbir azamaty balalaryn ózi ómir súretin aýmaqty taza ustaýǵa, tabıǵatty aıalaýǵa úıretse, kósheni, aýlany, ózen men kól mańaıyn eshkim tazalap júrmes edi. «Tazalyq – ımannyń jartysy» degen támsil bar atajurtta. Árbir adam, árbir otbasy tabıǵatty aıalaýdy óz basynan bastasa, balalaryna qorshaǵan ortany qorǵaýdy úıretse, nur ústine nur bolar edi, – deıdi D.Nurmanǵalıev.
Shekarany kúzetý – abyroıly borysh, al qorshaǵan ortany qorǵaý – árkimge de mindet. «Basqan» shekara bólimshesiniń sarbazdary qos jaýapkershilikti birge arqalap júr.
Odan keıin jas sarbazdar Muqyry aýyldyq okrýgindegi eki márte Sosıalıstik Eńbek Eri N.Aldabergenov memorıaly ornatylǵan saıabaq mańyn qoqystan tazartty. «Taza Qazaqstan» aksııasy aıasynda «Kıeli meken» tarıhı-mádenı eskertkishter aýmaǵy abattandyryldy. Aksııaǵa aýdan, aýyldyq okrýgterdiń 40-tan asa «Jasyl el» jastar eńbek jasaqtary qatysyp, tazalyq jumystaryn júrgizdi.
– Prezıdent Qasym-Jomart Toqaevtyń tapsyrmasymen bastaý alǵan aksııa elimizdiń ár aımaǵynda ótip jatyr. Bul jasqa da, jasamysqa da tabıǵatty qalaı aıalaý qajettigin túsindirdi. Barsha aýdan turǵyndaryna «Taza Qazaqstan» aksııasyna belsene atsalysyńyzdar dep aıtqym keledi. Sebebi ózińiz turyp, aýasyn jutqan óńirdiń taza bolýy tek ózińizge baılanysty ekenin umytpaý kerek, – deıdi Alǵabas aýyldyq okrýginiń «Jasyl el» jastar eńbek jasaqshysy Arýjan Ernarqyzy.
Senbilikke qatysýshylar qural-saımandar men qoqysty jınaýǵa arnalǵan qapshyq jáne qolǵappen qamtamasyz etildi. Jalpy, «Taza Qazaqstan» aksııasy bastalǵaly beri Kóksý aýdanyna qarasty aýyldardan 6 myń tonnaǵa jýyq kúl-qoqys pen qatty turmystyq qaldyqtar shyǵaryldy. Aýdan boıynsha osyndaı 30 shaqty is-shara ótti.
Odan keıin oblystyq tótenshe jaǵdaılar departamentiniń qyzmetkerleri el jaýhary atanǵan Alakól kólinde sýasty tazalyq jumystaryn júrgizdi.
Shomylý maýsymy qarsańynda uıymdastyrylǵan aksııada oblystyq TJD arnaıy brıgadasy kóldi kúl-qoqystan tazalap, arnasyn qalypqa keltirý maqsatynda qyzý jumys júrgizdi. Nátıjesinde, Balqash kóliniń 10 km boıy 5 m tereńdikke deıin túrli qoqystan tazartyldy. Súńgýirler biregeı kól túbinen sellofan, plastık syndy 367 kg qoqys shyǵardy.
«Atqarylyp jatqan joba aımaqtyq emes, memlekettik bolýǵa tıis. Alakól kóliniń tabıǵı baılyǵyn joǵaltpaı saqtap qalý – bizdiń paryzymyz», deıdi mamandar. TJD súńgýirler kómegimen sý astyn qoqystan aryltyp, kóz jaýyn alatyn kógildir kólge alys-jaqynnan aǵylǵan jazǵy demalysyn ótkizýshilerge qaýipsiz ortada tazalyqty qamtamasyz etedi. Osy arqyly kól túbiniń lastanbaýyn qatań qolǵa alǵan tótenshe jaǵdaılar qyzmetkerleri «Taza Qazaqstan» aksııasy barysynda jerdiń beti ǵana emes, ózen-kól astynyń da nazardan tys qalmaýy kerektigin aıtyp, jetisýlyqtardy tazalyqqa shaqyrdy.
Jetisý oblysy
