Kreatıvti habtyń ashylý saltanatyna Mádenıet jáne aqparat mınıstri Aıda Balaeva, Senat depýtaty Andreı Lýkın men Astana qalasynyń ákimi Jeńis Qasymbek qatysty. Qonaqtar sándik-qoldanbaly óner sheberlerimen tanysyp, ulttyq bolmysty saqtaýda qazaqtyń dástúrli oıý-órnegin qasterlep, nasıhattaýdyń mańyzy zor ekenin aıtty.
Aýdany 1,5 myń sharshy metrdi quraıtyn úshqabatty ǵımarat netvorkıng jasap, kreatıvti ındýstrııa jobalaryn júzege asyrý alańyna aınalmaq. Hab birneshe baǵyttaǵy aımaqtarǵa bólingen. Atap aıtqanda, kitap dúkeni men otandyq baspalardyń ónimderine arnalǵan oqý zaly, etno-murajaı, qolóner sheberhanalary, zamanaýı óner qoıylymdary, mýzykalyq jáne ádebı keshter alańy, sonymen qatar «Smart nomad games» jobasy men zamanaýı óner galereıasy bar.
«ÓzgeEpic» habyna biregeı etno-mýzeı men qolóner sheberhanasy kiredi. Munda hab aýmaǵynda otandyq baspalardyń ónimderin satýǵa arnalǵan kitap dúkeni bar. Astanadaǵy kreatıvti habtyń maqsaty – básekege qabiletti zamanaýı ónerdi damytý jáne qoǵamnyń mádenı sanasyn arttyrý, sondaı-aq daryndy jáne ıntellektýaldy jastardy qoldaý ári tálimgerlik etý», – dep elorda ákimi Instagram paraqshasynda jazdy.
Mundaı habtardy elimizdiń barlyq aımaǵynan ashý josparlanyp otyr. Bul shyǵarmashylyq jobalardy iske asyrýǵa jáne kommersııalandyrýǵa, sondaı-aq shyǵarmashylyq naryqqa júzdegen maman qosýǵa yqpal etedi.
