Qatelikti keshirmeıtin jol qatynastaryna qatysty derekterge úńilseń, tóbe shashyńyz tik turady. Bıyl jarty aıǵa jetpeıtin ýaqytta jol-kólik oqıǵasynan Almaty qalasynda 1 037 adam, Shymkentte 878 azamat zardap shekken. Ásirese Jambyl, Almaty, Mańǵystaý oblystarynda jol apaty jıi oryn alatyn kórinedi. Buǵan otandastarymyzdyń erejeni eskermegeninen bólek, toraptardyń ınfraqurylymy sekildi faktorlar da áser etip otyr. Jıynda aldymen saldarmen emes, sebeppen kúresýde qolǵa alynǵan is-sharalar aıtyldy.
– Jol qaýipsizdigi máseleleri jónindegi vedomstvoaralyq jumys tobynyń júrgizgen taldaýy zerdelendi. Júrgizýshi kýáligin alý emtıhanyna ózin-ózi daıarlaý toqtatyldy jáne «Avtomektep» aqparattyq júıesi ázirlendi. «Kólik quralyn basqarýǵa ruqsat alý týraly anyqtama berý» memlekettik qyzmeti elektrondyq formatqa aýystyryldy. Sondaı-aq kólik quraldaryna gaz ballon jabdyǵyn qaýipsiz ornatýdy baqylaý jónindegi is-sharalar jospary ázirlenip jatyr. Kólik mınıstrligi taksılerdiń «Iаndeks» jáne «Indraıv» iri agregatorlarymen yntymaqtastyq týraly memorandým jasady. Onyń aıasynda eńbek jáne demalys rejimin, taksı júrgizýshileriniń densaýlyq jaǵdaıyn, sondaı-aq avtomobıldiń tehnıkalyq jaı-kúıin baqylaý júzege asyrylatyn bolady. Trassalyq medısınalyq-qutqarý pýnktterin ornalastyrý jáne qaıta ornalastyrý boıynsha oryndardy belgileý ádistemesi ázirlendi. Oǵan sáıkes JKO oryndary men joldardyń apattyq-qaýipti ýchaskeleri Komıtettiń apattylyq kartasynda beınelengen, – dedi Bas prokýratýra Quqyqtyq statıstıka jáne arnaıy esepke alý jónindegi komıtetiniń tóraǵasy Sábıt Nurlybaı.
Basqosýǵa Ishki ister mınıstrligi Ákimshilik polısııa komıtetiniń tóraǵasy, óńirler ákimderiniń orynbasarlary, mınıstrlikterdiń beıindi vedomstvolarynyń jaýapty bólimsheleri, jergilikti atqarýshy organdardyń aýmaqtyq bólimsheleri, polısııa departamentteri, oblystyq prokýratýralar, Komıtettiń aýmaqtyq departamentteri, «QazAvtoJol» UK AQ-nyń basshylary, sondaı-aq IT-kompanııalardyń ókilderi qatysty. Otyrys barysynda VAJT qatysýshylarynyń usynystaryn eskere otyryp, qalyptastyrylǵan jol qaýipsizdigi deńgeıin arttyrý boıynsha usynymdardyń jańa paketi sarapqa salyndy. IIM Ákimshilik polısııa komıtetiniń tóraǵasy Qaısar Sultanbekov jol qaýipsizdigi salasyndaǵy problemalyq jáne keshendi sharalar qabyldaýdy qajet etetin máseleler týraly keńinen aıtyp berdi.
– Jol-kólik oqıǵasynyń aldyn alý, apattardyń saldaryn barynsha azaıtý maqsatynda respýblıkalyq trassalar men jergilikti avtojoldarda qaýipsiz jol ınfraqurylymyn qurý jóninde birqatar sharalar usynyldy. Atap aıtqanda, ýákiletti organdarmen birlesip avtojoldardy tekserý, jol qozǵalysyn uıymdastyrýdy ózgertý jónindegi jumysty júıeleý, rekonstrýksııalaý jáne jóndeý júrgizilip jatqan barlyq joldarda daıyn ýchaskelerdi ashý boıynsha jumysty jedel júrgizý, túngi ýaqytta trassalarda apattardy azaıtý úshin ınnovasııalyq «jaryq beretin» jol belgisin paıdalanýda sheteldik tájirıbeni qoldanýdy pysyqtaý, sondaı-aq jergilikti mańyzy bar joldarǵa qatysty baǵdarlama qabyldaý. Máselen, Atyraý qalasynyń syrtyndaǵy trassalarda buzýshylyqtardy zamanaýı fotobeınetirkeý júıelerimen jabdyqtalǵan sáıkestendirý belgileri joq polısııanyń qyzmettik avtomashınalarmen patrýldeý jumysy sátti synaqtan ótti. Osyndaı quqyq buzýshylyqtar týraly aqparat avtomatty túrde BP QSjAEK ÁIBT-niń Prosessıng ortalyǵyna jiberiledi, al quqyq buzýshyǵa aıyppul týraly habarlama keledi,– dedi ol.
Basqosýda mundaı tájirıbeni tolyq respýblıkada synaqtan ótkizý, sondaı-aq QSjAEK-pen birlesip, joldardaǵy buzýshylyqtardyń aldyn alý jáne jol-kólik oqıǵalarynyń shemasyn jasaý kezinde «drondardy» qoldaný, Densaýlyq saqtaý mınıstrligine Tótenshe jaǵdaılar mınıstrligimen jáne IIM Ákimshilik polısııa komıtetimen birlesip JKO-dan zardap shekken adamdarǵa ýaqtyly medısınalyq kómek kórsetý úshin jedel vedomstvoaralyq ózara is-qımyl máselesin pysyqtaý usynyldy.
Qatysýshylar otyrysty túıindeı kele, barlyq múddeli memlekettik jáne jergilikti atqarýshy organdar ózderiniń quzyretterine saı, respýblıkalyq jáne oblystyq deńgeılerde apat deńgeıin tómendetýge baǵyttalǵan naqty ári egjeı-tegjeı is-sharalardy ázirleýde birlese jospar qurýǵa ýaǵdalasty. Al komıtettiń jetekshiligimen vedomstvoaralyq jumys toby týyndaǵan máselelerdi sheshýge múmkindik beretin ortalyq retinde bekitildi.
