Jańa zań: Tártip pen talap qandaı?

Qaýly jobasy bıyldyń 1 tamyzyna deıin qoǵam tal­qysyna usynylyp otyr. Qu­jatqa sáıkes jýrnalısterdi akkredıtteýdiń ońaılatylǵan tártibi biryń­ǵaı medıa platforma arqyly júzege asyrylady. Sondaı-aq medıa platformada qazaq jáne orys tilderinde akkredıtteýdi júr­gizýge ótinishterdi qabyl­daýdy bastaý týraly habarlandyrý júkteledi. BAQ ókil­derine ýákiletti organ aıqyn­daıtyn tártippen akkredıtteý kartalary be­riledi.

– Jalpy atalǵan qujat jobasy qol­danystaǵy erejelermen salystyr­ǵan­da asa kóp ózgermegen. Mysaly, akkre­dıtteýden bas tartý negizderi týraly erejelerge toqtalsaq. Bul BAQ-tyń jumys isteýin ýaqytsha toqtatý nemese múl­dem jabý jáne resmı reestrde tirkelmegeni týraly sot sheshimi kúshine engen jaǵ­daıda iske asa­dy, – dep jazdy Aıda Balaeva Facebook paraq­shasynda.

Mınıstr jýrnalısterdiń arasynda eń kóp saýal týdyr­ǵan BAQ ókilderi qandaı talaptardy saqtaýy kerek degen Erejeniń 10-tarmaǵyna toqtaldy.

– Birinshiden, kez kelgen jýrnalıst qaı BAQ atynan akkredıtasııadan ótse, sol redaksııaǵa ǵana aqparat­ty jınap, jarııalaı alady. Alaıda jýrnalıske birden bir­neshe BAQ atynan akkredıtasııa alýǵa eshkim tyıym salmaıdy.

Ekinshiden, bul talap bel­gili bir oqıǵaǵa/is-sharaǵa qa­tysty jýrna­lısterdiń jeke pikirleri men ustanym­daryn áleýmettik jelilerdegi jeke akkaýnttarynda bildirýge qa­tysy joq.

Úshinshiden, reglament máselesine keletin bolsaq, qoldanystaǵy erejeler­de qazirdiń ózinde is-shara­ǵa qatysý­shylardyń taqy­ryp­ty, ýaqyt tártibin, qo­ǵam­dyq tártipti saqtaýyn júr­gizýshi (ıaǵnı is-shara moderatory) qamtamasyz etetini qarastyrylǵan, dedi ol.

Aıta keterligi, AQSh pen Eýropalyq Odaqtyń jáne halyqaralyq uıymdardyń tájirıbesi kórsetkendeı, bel­gilengen erejelerdi, son­­daı-aq zańnamany buz­ǵan jaǵdaıda jýrnalıst is-sha­ralarǵa qatysý quqy­ǵynan jáne akkredıtasııadan aıyrylady. Mysaly, Eý­roparlamenttegi BAQ qyz­metin retteıtin Erejede túsi­rilimge ruqsat etilgen arnaıy oryndar qatań túrde belgilengen.

– Tórtinshiden, erejede árbir memleket­tik organnyń nemese uıymnyń belgili bir is-sharanyń reglamentin ózi bekitetindigi kórsetilgen. Bul rette Mınıstrlik ýákilet­ti organ retinde aqparatqa qoljetimdilik qaǵıdatyn jáne jýrnalısterdiń erekshe mártebesin saqtaý máseleleri boıynsha atalǵan reglament­ti ázirleý boıynsha tıisti usynystaryn jiberetin bolady.

Besinshiden, erekshe mańyz­dy mem­lekettik obektilerge kirý jáne sol meke­melerdegi rejimderdi ustaný da qolda­nystaǵy zańnamany saqtaý men qaýip­sizdiktiń aınymas bóligi bolyp esepte­ledi. Qo­rytyndylaı kele, aqpa­rat­qa qol­je­timdilikti qam­tama­syz etý men jýrna­lıs­ter­diń mártebesin arttyrý – árqa­shan Mınıstrlik qyzme­ti­niń basty basymdyǵy ekenin taǵy da jetkizgim keledi, dedi Mádenıet jáne aqparat mınıstri.

Eske sala ketsek, Memleket basshysy Qasym-Jomart Toqaev bıyl 19 maýsymda «Mass-medıa týraly» zańǵa qol qoıǵan edi. Jańa qujat 20 tamyz­da, keıbir normalary 2025 jyldyń 1 qańtar aıynan bastap kúshine enedi.