Almaty.tv málimdegendeı, oblystyq sot 244 tomnan turatyn iske núkte qoıyp, 20 adamdy kináli dep tanydy. Sottalýshylar 7 jyldan 15 jylǵa deıin bas bostandyǵynan aıyryldy.
Búgingi otyrysta sot Taldyqorǵan qalalyq bilim bóliminiń esepshisin «qylmystyq topty uıymdastyrǵan» dep tanydy. Bas býhgalterdiń sybaılastarymen birigip, múlde jumys istemegen adamdarǵa jáne mektep qyzmetkerlerine jalaqydan tys aqsha aýdarǵany dáleldendi. Olar osy ádispen 3 jylda 4,5 mlrd teńgeden asa bıýdjet qarjysyn jymqyrǵan. Al dál osy zańbuzýshylyqtarǵa kóz jumyp kelgen revızııalyq komıssııanyń basshysy men onyń múshelerin prokýrorlar tekseredi.
– Sot mán-jaıdy basshylyqqa ala otyryp, Sergazınovanyń barlyq bilim bólimine qarasty bas býhgalterlerdi shaqyryp, senimdi adamdarmen uıymdasqan topty quryp, bastamashy bolǵany anyqtaldy, – dedi Jetisý oblystyq qylmystyq ister jónindegi mamandandyrylǵan aýdanaralyq sotynyń sýdıasy Baqyt Ermahanov.
Sýdıa qylmystyq istiń negizgi 3 uıymdastyrýshysyn 12 jyldan 15 jylǵa deıin bas bostandyǵynan aıyrdy. Al ózge 5 sottalýshy 7 jyldan 11 jylǵa deıin merzimin óteıdi. Taǵy 2 esepshi shartty túrde sottalsa, bireýine qatysty is qaıtys bolýyna baılanysty toqtatyldy.
– Uıymdasqan qylmystyq top qurǵan 10 adam, olar QK-tiń 262-baby, 3-bóligi jáne 189-babtyń 1-2 tarmaqtary, al qalaǵan 10 adam QK-tiń 189-baby, 2-tarmaǵy boıynsha kináli bolyp tabyldy, – dedi Jetisý oblystyq prokýratýrasynyń aǵa prokýrory Saıan Dúısebaev.
Sottalýshylardyń deni 25-50 jas aralyǵyndaǵy qyz-kelinshekter. Arasynda jas bosanǵan ana da, aı-kúnin kútip otyrǵan júkti áıelder de bar. Olar aqsha jymqyrǵandaryn ǵana moıyndap, qalǵan bóliginde ózin aqtaýdy surady.
– О́te qatań jaza berildi. Prokýror da ne sebepti bas bostandyǵynan aıyrý jazasyn taǵaıyndylǵanyn negizdemedi. Ol kiside buryn sottalmaǵan, densaýlyǵyn, jasyn eskerip, qoldaýǵa bolar edi, – dedi qorǵaýshy Dınara Ábdikárimova.
Aıta keteıik, atyshýly qylmysqa qatystylardan 3 mlrd teńgeden asa aqsha alyndy. Zergerlik buıymdar, jyljymaıtyn jáne jyljymaly múlikter de tárkilengen.
