Bir kúni Olımpıada qalashyǵynda serýendep júrgen túıe palýan Krıs Teılor nemis qarsylasy Vılfrıd Dıtrıhtiń ózine qaraı kele jatqanyn baıqaıdy. Jasy kishi Teılor birinshi sálem berip qolyn usynady. Al Dıtrıh bolsa qolyn joǵary kóterip, basyn shaıqaıdy. Sodan soń jaqyn keledi de, aldaǵy dodaǵa sáttilik tilep, qatty qushaqtaıdy. Syılastyq sıpatyndaǵy bul áreket qarsylasynyń barlaýy men zertteýi ekenin ol kezde Teılor, árıne, bilgen joq edi.
Bul Dıtrıhtiń Germanııa chempıonatyn 28 ret jeńip kelgen kezi, al tórtjyldyqtyń basty básekesine Melbýrnda Olımpıada ótken 1956 jyldan bastap qatysyp kele jatqan tusy. Tarıhta qalatyn kúres kórsetip, sporttyq jolyn ádemi qorytyndylaǵysy kelip júrgen ol oıyna birden qol jetkizedi. Izdegenge suraǵan degendeı, aldynan naıqalǵan nardaı bolyp Amerıkanyń zilmaýyr palýany shyǵady.
Dıtrıh olımpıadada barlyq múmkindigin kórsetkisi keldi jáne ol úshin tynbaı jumys istedi. Ol óziniń qaıraty qaıtyp, qýaty kemigenin sezetin. О́mir bolǵan soń oǵan qarsy turý joq. Biraq nemis palýany búkil nazaryn kúshke emes, aılaǵa túsirgen.
Teılordy tize búktirgennen keıin, jýrnalıster Dıtrıhten suhbat aldy. Olar 200 kg túıe palýandy laqtyratynyna nelikten senimdi bolǵanyn surady. Sondaǵy Dıtrıhińniń aıtqan sózi: «Men 200 kılony kótere alatynyma bek senimdi edim. Tek Teılordy qapsyra ustaýǵa, qushaǵym jetpeı me dep kúdiktendim. Kúrestiń aldynda onymen kezdesken kezimde, ol meniń qolymdy alǵysy keldi. Biraq men onyń ornyna Teılordy qatty qushaqtadym. Qoldarymnyń bir-birine jetetinine bilgen soń, men ony shalqasynan laqtyra alatynymdy túsindim jáne mindetti túrde solaı etetinime senimdi boldym».
Iá, qarsylasynyń «ahılles ókshesin» maıdanǵa túspeı jatyp bilý – sportshy úshin jarty jeńis. Biraq ondaı deńgeıge jetý úshin suńǵylalyq qajet-aq.
