Foto: Ulttyq sport qaýymdastyǵynyń baspasóz qyzmeti
Aýqymdy sporttyq sharaǵa 10-nan astam elden komandalar qatysady. Iran, Túrkııa, Vengrııa, Qyrǵyzstan, Ońtústik Afrıka Respýblıkasy Reseı Federasııasynyń jáne t.b. elderdiń shabandozdary dúbirli dodada baq synaıdy.
Aıta keterligi, Qyrǵyzstan quramasy «Uly dala joryǵyna» qatysatyn eń úzdik attardy irikteý maqsatynda kópkúndik at sporty marafonyn ótkizgen.
Qyrǵyzstan At sporty federasııasynyń vıse-prezıdenti Manas Sultanov «Uly dala joryǵy» marafon-báıgesine shaqyrýdy qabyldaý úlken mártebe ekenin atap ótti.
«Qazaqstanda ótetin kópkúndik at jarysyna daıyndyq aıasynda 300 shaqyrymdyq qashyqtyqqa «Kochmondor jýrýshý» irikteý marafony ótti. Barlyq komandalarǵa sáttilik tileımin jáne jeńimpazdardyń kóp bolýyn qalaımyn. Eń tózimdi jáne jyldam sáıgúlikter jeńiske jetip, tuǵyrdan kórinetinine senimdimin», dedi M.Sultanov.
Marafon-báıge 5 myń jyldan astam buryn adam balasy jylqy malyn alǵash ret qolǵa úıretken Soltústik Qazaqstan oblysyndaǵy Botaı eldi mekeninde 3 qyrkúıekte bastalady.
«Uly dala joryǵyna» Kabardın-Balqar Respýblıkasynyń quramasy da qatysýǵa daıyndalyp jatyr. «AMD Kavkaz» at sporty klýbynyń negizin qalaýshy Ahed Mahov elimizden at jarysyna qatysýǵa shaqyrtý alǵanyn atap ótti.
«Marafon-báıgeniń búkil adamzat úshin kıeli meken sanalatyn Botaı qonysynan bastalýy erekshe mańyzdy. Bizdiń komanda ańyzdar men tarıhı jádigerlerge toly Botaı jerine barýǵa erekshe yntaly. Olaı bolsa, kút bizdi, Qazaqstan!», dedi A.Mahov.
Aıta keteıik, at jarysy astanada 7 qyrkúıekte aıaqtalady. Onyń jeńimpazdary 8 qyrkúıekte ótetin 5-shi Dúnıejúzilik kóshpeliler oıyndarynyń ashylý saltanatyna qatysady.
«Uly dala joryǵy» – jylqynyń eń myqty tuqymy anyqtalatyn dalalyq laborotorııasy.
Eske sala keteıik, «JORYQ» respýblıkalyq federasııasy Qazaqstan Respýblıkasy Ulttyq sport qaýymdastyǵynyń quramyna kiredi. Sonymen qatar Qaýymdastyq quramyna báıge, kókpar, aýdaryspaq, asyq atý, sadaq atý, jamby atý, teńge ilý, qusbegilik jáne t.b. federasııalar kiredi. Qazaqstan Respýblıkasynyń Ulttyq sport qaýymdastyǵyna belgili kásipker, mesenat, «Altyn Qyran» qory qamqorshylyq keńesiniń tóraǵasy» Islambek Saljanov basshylyq etedi.
