Sýretti túsirgen – Erlan OMAR, «EQ»
Otyrysta aldymen Ishki ister mınıstri Erjan Sádenov eldegi jol qaýipsizdiginiń tóńireginde qalyptasqan jalpy ahýaldy baıandap shyqty.
Úkimet basshysy elimizde jol apattarynyń sany azaımaı otyrǵanyn aıta kele, elimizdegi ólim-jitimge mysal keltirip, osy jyldyń 6 aıynda-aq myńǵa jýyq adam qara joldyń ústinde qaza tapqanyna qynjyldy.
Premer-mınıstr kólik júrgizý mádenıetiniń, júrgizýshiler men jaıaý júrginshilerdiń ereje saqtaý tártibiniń deńgeıi tómen ekenine nazar aýdara otyryp, mopedter máselesin de kóterdi.
Mınıstrdiń baıandamasynan keıin sóz alǵan Oljas Abaıuly elimizdiń bas polıseıi Erjan Sádenovten mopedterdi «tusaýlaýǵa» qatysty qolǵa alynyp jatqan is-sharalar jaıyn surady.
– Jańa ǵana «Egemen Qazaqstan» gazetine shyqqan «Mopedterdiń máselesi ýaıymǵa aınaldy» degen maqalany oqyp shyqtym. Sol maqalada kórsetilgendeı, bıyldyń ózinde mopedterdiń qatysýymen bolǵan apattarda 27 adam qaza tapqan. Bul masqara derekter ǵoı! Osy máseleni qalaı sheship jatyrmyz? dedi O.Bektenov mınıstrge qarata.
E.Sádenov mundaı problemanyń bar ekenin moıyndap, kúsheıtilgen jumystyń arqasynda moped júrgizýshileri myńdap tártiptik jazaǵa tartylyp jatqanyn jetkizdi.
– Kóbine mopedtermen jasóspirimder, kýrerler júredi. Zańnama aıasynda tıisti sharalar qabyldap jatyrmyz. Barlyq mopedter tirkeýge alynbaq. Olarǵa memlekettik nomer beriledi. Sodan keıin ol mopedterdi júrgizý úshin kýálik alý kerek bolady. Qazir zań jobasy Senatta jatyr. Biraq biz zańnyń kúshine engenin kútip otyrmaı jumys júrgizip jatyrmyz. Búginde 39 myń júrgizýshi anyqtalyp, tártiptik jazaǵa tartyldy. Onyń ishinde 202 adam – kámeletke jasy tolmaǵandar. Olardyń ata-analary jaýapqa tartyldy. Al aıyp turaqtaryna 5 myńnan astam moped qoıyldy. Bul jumystardy áli de jalǵastyramyz, – dedi Erjan Sádenov.
Úkimet basshysy otyrysta mundaı tártip buzatyndarǵa qatań sharalar qoldanylýy qajettigin mindettedi.
Qysqasy, kún tártibindegi osy máselege qatysty kóp jaıtqa nazar aýdarǵan O.Bektenov Ishki ister, Oqý-aǵartý, Mádenıet jáne aqparat mınıstrlikteri men ákimdikterge jol qozǵalysy men qaýipsizdik erejelerin saqtaý baǵytyndaǵy aqparattyq-túsindirý jumystaryn jandandyrý qajettigin tapsyrdy.
