Mádenıet saraıynyń aldaǵy taǵdyry týraly arnaıy brıfıng berýdi uıǵarǵan qalalyq ákimdik ókilderi jýrnalısterdi atalǵan ǵımarat mańyna jınady. Búgingi tańda mádenıet oshaǵynyń aınalasy túgel temir qorshaýmen qorshalǵan. О́ıtkeni osynsha jyl qaraýsyz jatyp, ne esigi, ne terezesi joq bolǵandyqtan kim kóringen bul jerdi pana etip alǵan. Ásirese jastar osy mańǵa úıirsektep alǵan edi. Ol jerde ne isteıtinderi beımálim, áıteýir turǵyndar jas jetkinshekter kúndiz de, túnde de ishinde topyrlap júredi dep talaı shaǵym aıtqan. Aqyry sonyń arty qaıǵyly jaǵdaımen aıaqtaldy. Úsh bozbala selfıletemiz dep túnde ishine kirgen, sol kezde betondy qurylym opyrylyp túsip bireýin basyp qalǵan. Qudaı saqtap qalǵan ekeýi qashyp úlgergen. Mine, sodan beri ol jerdiń aınalasy temir qorshaýmen qorshalyp, tas bekitýli.
Joǵaryda aıtqanymyzdaı, endi ol buzylatyn boldy. Bul týraly brıfıngte Shymkent qalalyq ishki saıasat jáne jastar isi basqarmasy basshysynyń mindetin atqarýshy Áıgerim Jumaǵulova aıtyp berdi.
«Nysan byltyr qarashada shahardyń kommýnaldyq qyzmetine ótken edi. O basta qaıta jańǵyrtylady degen sheshim bolǵan. Bul jumyspen «Sábı» qaıyrymdylyq qory aınalysatyn bolyp sheshilgen. Qor qurylys sapasyn anyqtaý úshin sarapshylarǵa júginedi. Sarapshylyq uıym nysannyń paıdalanýǵa jaramaıtyny týraly tujyrym jasaıdy. Sonymen, endi ǵımarat aldaǵy ýaqytta súriledi. Iesi bolsa da bul mań qaraýsyz qaldy. Sonyń saldarynan bul jerde urlanbaǵan zat qalmady. Temir betonnyń armatýrasyna deıin jurt kesip áketti. Endi mádenıet saraıynyń ornyna jańadan dál osyndaı pishinde, syrtqy kelbeti de týra qazirgisin qaıtalaıtyn úlken záýlim saraı turǵyzylady. Qurylys jumystary bıyl qyrkúıek aıynda bastalady. Bıýdjetten eshqandaı qarajat bólinbeıdi. Barlyq shyǵyndy «Sábı» qaıyrymdylyq qory ózi kóteredi. Eski ǵımarat ornyna jastar ortalyǵy kesheni boı kóteredi. Joba boıynsha jańa nysanda túrli úıirmeler, jastar men oqýshylardyń bos ýaqytyn tıimdi uıymdastyrýǵa arnalǵan barlyq jaǵdaı qarastyrylady. Sonymen qatar mádenıet saraıynyń aınalasy gúlzar men saıabaqqa aınalady. Sýburqaqtar iske qosylady. Balalar men sporttyq alańshalar paıda bolady», dedi Á.Jumaǵulova.
Fosforshylar saraıynyń jaǵdaıyna alańdaǵan janashyr qala turǵyndarynyń biri, 90 jastaǵy qarııa, qala ákiminiń keńesshisi О́rken Ábdireev aqsaqal da búgingi jıynǵa qatysty. Alǵashqy bastamany kótergen de osy qarııa bolatyn. On shaqty jyldan beri qoǵam men ákimdik nazaryn osy máselege aýdarýǵa tyrysyp júrdi. Áreketi nátıjesiz qalmady. Qala ákimi Ǵabıt Syzdyqbekov aqsaqalmen arnaıy kezdesip, mádenıet saraıynyń jaı-kúıimen tanysty. Artynsha aýqymdy senbilik uıymdastyrylyp, ǵımarattyń aınalasy kúl-qoqystan tazalandy. Jan-jaǵyndaǵy qaýlap ósip ketken shópter, artyq taldar kesilip, retke keltirildi. Qoǵam belsendisi jyldar boıy shahardyń bas aýrýyna aınalǵan problemanyń sheshilgenine qýanyshty. Ǵımarattyń jan-jaǵy – tolǵan úı. Balalar kún ystyqta qaıda oınaryn bilmeı júredi. Endi olarǵa keremet múmkindik týyp tur. Bir-eki jylda bul jer sándi saıabaqqa aınalady. Balalar da úlkender de sonda demalyp, sport, oıyn alańshalarynda bos ýaqytyn ótkizedi. Odan qalsa, jańa saraıda túrli úıirmelerge qatysyp, ózderin damytady degendi aıtty qarııa.
Buǵan qosa aqsaqal qurylysqa, jalpy qalanyń mádenı salasyna baılanysty birneshe usynysyn jetkizdi. Birinshiden, bolashaq mádenıet saraıy ulttyq oıý-órnektermen áspettelgen, sáýleti shyǵys úlgisine jaqyn nysan bolsa degen tilegin aıtty. Ekinshiden, talaı tyndyrymdy is qylǵan memleket jáne qoǵam qaıratkeri О́zbekáli Jánibekovtiń aty osy mádenıet saraıyna berilse degen oıyn jarııalady. О́ıtkeni О́zaǵańdaı qazaq mádenıeti men ónerine qyzmet etken adam az deıdi. Biri – sonaý Ermıtajdaǵy Taıqazandy elge ákelýge septigin tıgizgeni, ekinshisi – halqymyzdyń tól merekesi Naýryzdy jańǵyrtýy. Qarııanyń úshinshi usynysy kompartııanyń birinshi hatshysy Hrýshevke tikeleı qarsy shyǵyp, Qazaqstannyń jer tutastyǵyn saqtap qalǵan halqymyzdyń adal azamaty Jumabek Táshenov eskertkishi jańǵyrtýdan ótken Shymkenttiń temirjol vokzalynyń aldynan turǵyzylsa degen ıdeıasy boldy. Aqsaqaldyń pikirinshe, Shymkentti elimizdegi eń kórikti, sáýletti qalaǵa aınaldyrýǵa tolyq múmkindik bar. Shahardy damytý tujyrymdamasyna oraı bul tirlikter atqarylyp ta keledi. Osy oraıda atamyz jańadan ashylyp jatqan gúlzar men saıabaqtardy, joldardyń jóndelip, talaı jyl topyraǵy kórinip jatqan ishki kóshelerdiń asfalttalyp jatqanyn tilge tıek etti.
Osy brıfıng barysynda qalalyq tótenshe jaǵdaılar departamenti bastyǵynyń orynbasary Erkin Otarǵalymuly keıingi 5 jylda ǵımarat ishindegi qurylymdardyń qulaý faktileri boıynsha 7 oqıǵa tirkelgenin jetkizdi. Sońǵysy, joǵaryda aıtyp ótkenimizdeı, byltyr jeltoqsan aıynda oryn alǵan. Sonyń saldarynan bir jasóspirim qaıtys boldy. Sondyqtan departament ókili ǵımarattyń qazirgi qalpy qaýipti ekenin baıandady.
«Arnaıy mamandandyrylǵan mekeme atalǵan nysan kúrdeli jóndeýge kelmeıdi degen qorytyndy berdi. Biraq ákimdik ókilderi málimdegendeı, bul jerde qaıtadan sol burynǵy qalpyn saqtaǵan jańa nysan paıda bolady. Bul ǵımarat pen onyń aınalasyndaǵy saıabaq eń birinshiden osy tóńirektegi turǵyndarǵa jaqsy bolǵaly tur. Jalpy, qala boıynsha 107 apatty nysan bar. Olardy qalpyna keltirý, kúrdeli jóndeý jóninde tıisti mekemeler tarapynan jumystar júrgizilip jatyr», dedi Erkin Otarǵalymuly.
