Foto: portalramn.ru
Internetke «jasandy ıntellekt» dep jazsańyz, aldyńyzdan robot beınesi, mıdyń sýreti, kóp sıfrlar men tańbalar shyǵa keledi. Bizdiń sanamyzda jasandy ıntellektiniń beınesi osyndaı. Yandex Qazaqstan kompanııasynyń jasandy ıntellekt tehnologııalaryn damytý jónindegi dırektory Aleksandr Kraınovtyń aıtýynsha, negizinde jasandy ıntellekt qara jáshik ispetti. Bul jáshiktiń ishinde kúrdeli shemalar, neırondyq jeliler bolady. Ol neırondyq jeliler birneshe qabattan, qabattar neırondardan turady. Neıron – qarapaıym formýla. Munda birneshe málimet kelip, bir sheshim shyǵarylady.
Jasandy ıntellektiniń oqytý jáne qoldaný degen eki kezeńi baryn eskersek, adam ázirlegen robot ózdigimen eshteńe úırene almaıdy. Onyń baǵdarlamasyna túrli dúnıeni engizetin, oqytatyn – adam. Qandaı da bir robotty jasap ózdigimen jibere salsańyz, onyń qazirgi deńgeıi men 10 jyldan keıingi deńgeıi bir bolady. Al adam mıy kún saıyn jańa málimet qabyldaıdy.
Jalpy jasandy ıntellekt týraly túsinikti jetkizý qıyn nárse. Ol týraly naqty túsinik joq. Árkim ártúrli pikir aıtady. Bireýler jasandy ıntellekt adamǵa tán qabiletterdi júzege asyra alatyn mashına deıdi. Aleksandr Kraınov ony adam sheshe almaıtyn esepterdi sheshýge qaýqarly qural dep otyr. Máselen, adam op-ońaı aqýyz molekýlasynyń qurylymyn aıta almaıdy. Jasandy ıntellekt adam mıyna kirip-shyqpaıtyn osyndaı boljamdardy boljaı alady. Biraq ol barlyq jaǵdaıda shyndyqqa janaspaýy múmkin. Senimdilik úshin faktchekıng jasaǵan abzal.
Qaıtkende de jasandy ıntellekt bizdiń ómirimizdiń bir ajyramas bóligine aınaldy. Qazir biz jasandy ıntellektiniń tehnologııalaryn ǵana emes ónimderin de jıi qoldanyp júrmiz. Bir qýantatyny qazir qazaq tildi ónimder de kóbeıip keledi. Qazir Yandex Qazaqstan kompanııasy qazaq tilinde jasandy ıntellekt ónimderin ázirleýge belsendi túrde ınvestısııa salyp jatyr. Bul týraly Qaz.AI Jasandy ıntellektini damytý qaýymdastyǵy uıymdastyrǵan master-klass barysynda belgili boldy. Bul qadam elimizdiń jasandy ıntellekt salasyndaǵy ustanymyn edáýir kúsheıtýge jáne jańa tehnologııalardyń damýyna yqpal etýge baǵyttalǵan.
Qaz.AI qaýymdastyǵy Qazaqstandaǵy tehnologııalyq kompanııalardy biriktirip, bilim men tájirıbe almasý platformasy retinde qyzmet etedi. Qaýymdastyq qurylǵan sátten bastap jasandy ıntellekt salasyndaǵy ulttyq damý men operasııalyq júıelerdegi ózgeristerdi retteýmen aınalysyp keledi. Jaqynda qaýymdastyq master-klass ótkizip, jasandy ıntellektini qoǵamda qalaı qoldanýǵa bolatynyn túsindirdi. Sondaı-aq oqý barysynda qatysýshylar jasandy ıntellektige baılanysty túrli máseleler men múmkindikter týraly talqylap, bilimderin tereńdete tústi.
Kezdesý barysynda Qaz.AI jasandy ıntellektini damytý qaýymdastyǵy Yandex Qazaqstan-nyń jańa múshesi retinde qosylǵanyn habarlady. Basshylyqtyń aıtýynsha, Qazaqstanda bul seriktestik jasandy ıntellektini engizýdi jyldamdatady ári birige kótergen júk jeńil bolary anyq.
«Yandex Qazaqstan-nyń qaýymdastyqqa qosylǵanyna qýanyshtymyz. Tájirıbeli, aýqymdy saraptamasy bar Yandex Qazaqstan sııaqty iri kompanııanyń múshelik etýi bizdiń múmkindikterimizdi aıtarlyqtaı arttyrady. Innovasııalardy ilgeriletýge jáne elimiz úshin negizgi bastamalardy qoldaýǵa kómektese otyryp, Qazaqstanda Ulttyq jasandy ıntellektini damytý baǵytynda qyzmet etemiz», dedi Qazaqstandaǵy jasandy ıntellektini damytý qaýymdastyǵynyń tóraǵasy Baqytjan Eshmuhambetov.
Joǵaryda aıtyp ótkenimizdeı, Yandex Qazaqstan qazaq tilinde JI-ónimderin daıyndaýǵa ınvestısııa salyp jatyr. Osy ýaqytqa deıin ázirlengen jumystarynyń ishinen vırtýaldy kómekshi – Alısany, izdeý múmkindikteri men úlken generatıvti modelderdi biriktirgen Neıro qyzmetin, mátindi aýdarýǵa kómektesetin aqyldy kamerany, vıdeony qazaq tiline aýdarýǵa, dybystyq joldy taldaýǵa jáne grammatıkalyq erekshelikterin eskerýge múmkindik beretin Iаndeks braýzerindegi vıdeonyń neırojelilik aýdarmasyn erekshe atap ótýge bolady. Olardyń qaı-qaısysy da ýaqytty únemdeýge, jumysty jeńildetýge kóp kómek beredi.
2024 jylǵy shildede Premer-mınıstr Oljas Bektenovtiń tóraǵalyǵymen ótken Úkimet otyrysynda 2024-2029 jyldarǵa arnalǵan jasandy ıntellektini damytý tujyrymdamasy bekitilgen-di. Qujat ekonomıkanyń ártúrli salalaryna jasandy ıntellekt tehnologııalaryn engizýdi jáne 2029 jylǵa qaraı jasandy ıntellekt ónimderiniń sanyn bes esege arttyrýdy kózdeıdi. Sonymen qatar bilikti mamandardy daıarlaý úshin jasandy ıntellekt boıynsha bilim berý baǵdarlamalaryn keńeıtý jáne ekonomıkada mýltıplıkatıvtik áser jasaý úshin otandyq kompanııalardyń qajettilikterin esepke alý josparda bar. Atalǵan bastamalardy Qaz.AI qaýymdastyǵy Yandex Qazaqstan qyzmetiniń qoldaýymen júzege asyrýǵa nıetti. Bul Qazaqstanǵa jasandy ıntellekt salasynda kóshbasshy pozısııalardy alýǵa jáne ulttyq ınnovasııalyq ekojúıeni nyǵaıtýǵa kómektesedi.
