El ustazdary bul kisini pedagogıka salasynyń sheberi jáne áıgili Qyzdar pedagogıka ınstıtýtyn uzaq jyl basqarǵan rektor, tanymal akademık retinde jaqsy biledi.
Kúlásh Qunantaıqyzy eńbektegi jolyn Almaty oblysyndaǵy aýyl mektebinen, al ǵylymdaǵy soqpaǵyn Abaı atyndaǵy Qazaq pedagogıka ınstıtýtynyń (QazPI) professory R.G.Lembergtiń aspıranty deńgeıinen bastap, qıyn jyldary komsomoldyń mektep bólimin basqaryp, joǵary jáne orta bilim mınıstriniń orynbasary, shet tilder ınstıtýtynyń prorektory, QyzPI rektory qyzmetteri satysynan ótti. Ol qaı jumysta bolsa da qanyna sińgen adaldyqtan aınyǵan emes. Týrashyldyq qasıet onyń ómirlik kredosyna aınaldy. О́zine de, ózgege de qatań talap qoıa bildi.
1968 jyly 6 tamyzda 37 jastaǵy Kúlásh Qunantaıqyzy Qazaq memlekettik qyzdar pedagogıka ınstıtýtyna rektor bolyp taǵaıyndaldy. Bul – el basshylyǵynyń úlken senimi edi. Bilim qaıratkeri osy oqý ornyn 16 jyl basqaryp, atalǵan ınstıtýttyń órkendeýine ólsheýsiz úles qosty. Ol rektor bolǵan tusta 9 nysannyń (4 qabatty oqý korpýsy, 3 jataqhana, oqytýshylar turǵyn úıi, jańa tıpti kitaphana, ashana ǵımarattary, Qaskeleńdegi agrobıoýchaske, Qapshaǵaıdaǵy demalys úıi) boı kóterýine uıytqy boldy. Mádenı salaǵa kelsek, ataqty «Aıgúl» ansamblin quryp, kitaphana jáne mýzykalyq bilim salasynda tyń jobalardy júzege asyrdy.
Ǵalymnyń urpaq jadynda qalar ıgi isteri jetkilikti. Ásirese, basshy retinde de, ustaz retinde de qazaq qyzdarynyń tárbıesine aıryqsha kóńil bólip, bolashaq analardyń júregine bilim men meıirim nárin quıa bildi. Ǵalym retindegi ǵylymı taqyryby da áıelder taqyrybymen astasyp jatyr. Kúlásh Qunantaıqyzynyń 1981 jyly qorǵaǵan doktorlyq dıssertasııasynyń «Qazaqstandaǵy áıelderge bilim berý isi: qalyptasýy men damýy» dep atalýy da kezdeısoq emes. Ol qashanda qazaq áıeliniń eńbegin, adaldyǵyn, rýhyn asqaqtatyp júrdi. Ol osylaısha ǵylymı izdenis jolynda aqyl-parasatyn jumsady, ter tógip tynymsyz eńbek etti. Adal eńbeginiń nátıjesin kórdi, shákirtter tárbıeledi, óziniń ǵylymı mektebin qalyptastyrdy.
«Tuńǵysh» sózi Kúlásh Qunantaıqyzynyń esimimen baılanysta aıtylady. Ol qazaq qyzdarynyń ishinde birinshi bolyp pedagogıka salasynda ǵylym doktory atandy. Kezindegi KSRO Pedagogıka ǵylymy akademııasyna qazaq qyzdarynyń arasynan birinshi korrespondent-múshesi bolyp saılandy. Qazaq qyzdarynyń ishinen tuńǵysh Reseı Bilim akademııasynyń múshesi, Grýzııa Bilim akademııasynyń múshesi bolǵan da – Kúlásh Qunantaıqyzy. Elimiz táýelsizdik alǵan soń Joǵary attestattaý komıssııasynyń pedagogıka, psıhologııa ǵylymy saraptama bólimshesiniń alǵashqy tóraǵasy da – osy ǵalym.
Halqymyz ǵalymnyń haty da, aty da elmen birge jasaıtynyna kýálik beredi. Biz osy danalyqty Qazaqstan pedagogıka salasynyń teorııasy men praktıkasyna, iri jobalaryna úles qosqan professor, akademık marqum Kúlásh Qunantaevaǵa qatysty da aıtamyz. Ustazdardyń ustazynyń ómiri áli talaı urpaqqa ónege bolary sózsiz.
Perızat Seıitqazy,
pedagogıka ǵylymdarynyń doktory, professor
