Foto: olympic.kz
Bas bapker 80 kelide qorjynǵa kúmis medal salǵan Nurbek Oralbaıdyń jekpe-jeginen keıin dúbirli dodadaǵy boksshylardyń júrip ótken jolyn qorytyndylady.
«Qazirgi ýaqytta O. Hıjnıak álemniń eń myqty boksshylarynyń biri. Buǵan deıin de bizdiń talaı boksshymen judyryqtasqan. Jartylaı fınalda álemniń eki dúrkin chempıony, Olımpıada jeńimpazy kýbalyq Lopesti de utty. Al biz búgingi jekpe-jekke tyńǵylyqty, eki kún jaqsylap daıyndaldyq. Aıla-tásilderdi qarastyrdyq. Keı tusta biz oılaǵandaı bolmady. Jalpy Nurbek úsh raýnd boıy tapsyrmany durys oryndady. Buıyrmaı tur eken. Hıjnıaktyń baǵy janyp tur eken. Ol osy joly Olımpıada chempıony boldy, Tokıoda ekinshi oryn alǵan. Jekpe-jek óte tartysty ótti. Muny tek qana men emes daıyndyq, kıim aýystyrý bólmesinde basqa eldiń ókilderi de aıtyp, Nurbektiń sheberligine jaqsy baǵa berip jatyr. Eki myqty kezdesti. Mundaıda birin-biri alý qıyn. Dese de Nurbek baryn saldy. Birinshi kezekte bárine raqmet aıtamyz. Eldegi jankúıerlerdiń jaǵdaıyn túsinemin. Bizdiń jekpe-jekterge kóńilderi tolǵan joq. Sol úshin keshirim suraımyz», dedi Myrzaǵalı Aıtjanov.
Bas bapker shákirtteriniń fızıkalyq daıyndyǵyn synap, sońǵy raýndta sharshap qalyp jatyr degen kópshilik oıymen kelispeıtinin de jetkizdi.
«Bul Olımpıadada biz kútpegen sensasııalar kóp boldy. Álemniń bes dúrkin, Olımpıadanyń eki dúrkin chempıondary da júldege ilige almaı qaldy. Parıjdegi oıyndarda bizge altyn buıyrmady. Biraq jigitterge esh renish joq. Kópshilik synaǵandaı sharshamady, baryn saldy. Eshkim de jeńisti qoldan bermedi.
Bul Olımpıada bárimizge sabaq bolatyny anyq. Osymen ekinshi Olımpıadada altynsyz qalyp otyrmyz. Biraq men qazaq boksynyń jeńisti dástúrge qaıta oralyp, aıaqqa nyq turaryna senemin», dedi Myrzaǵalı Aıtjanov.
