Raıymbek batyr atyndaǵy Almaty desanttyq-shabýyldaý brıgadasynyń áskerı qyzmetshileri «Ile» oqý ortalyǵynda jattyǵý qımyldaryn júrgizý daǵdylaryn pysyqtady. Jaýyngerlik atystardyń aldynda eki aptalyq daıyndyq bolyp, onyń barysynda merzimdi qyzmet sarbazdary atystyń qarapaıymnan kúrdeli túrine deıin taktıkalyq jáne arnaıy daıyndyq boıynsha normatıvterdi shyńdady. Odan bólek, ártúrli jaǵdaıda jaýyngerlik tapsyrmany oryndaý ádisteri men tásilderin úırendi.
– Bólimshelerdi daıyndaý barysynda árbir áskerı qyzmetshi bólimshedegi óz ornyn, róli men mindetterin jete túsindi. Jaýyngerlik atys kezeńinde jeke quram, birtutas mehanızm retinde áreket etedi, – deıdi 61993 áskerı bólimi desanttyq-shabýyldaý rotasynyń komandıri, aǵa leıtenant Álisher Edenov.
Biraq jaýyngerlik daıyndyq kezinde basty ról komandırlerdi oqytýǵa baǵyttalǵan. Olar qajet kezde sheshim qabyldap, ár jaýyngerdiń maqsattary men mindetterin anyqtaıdy, jeke quramnyń áreketterin úılestirýge jaýap beredi. Buǵan qosa jaýyngerlik tapsyrmanyń oryndalýyn baqylaıdy.
Bólimshelerdi daıarlaý barysynda komandırler jaýyngerlik is-qımyldardy saýatty josparlaýdy, jaýyngerlik atys josparlaryn ázirleýdi, jer bederi, aýa raıy jaǵdaılary jáne jaýyngerlik tapsyrmalar sııaqty ártúrli faktorlardy eskerýdi úırenedi. Olar urys alańyndaǵy jaǵdaıdy tez jáne dál baǵalaý, shekteýli ýaqyt jaǵdaıynda sheshim qabyldaý daǵdylaryn jetildiredi.
Jazǵy oqý kezeńinde desanttyq-shabýyldaý áskerlerinde barlyǵy 500-den astam bólimshe daıyndyǵy josparlanǵan. Bólimshelerdiń jaýyngerlik atystary bilim men uıymshyldyqty jetildirý maqsatynda júrgiziledi.
