Foto: turaninfo.kz
Yntymaqtastyqtyń jańa tetikteri eldegi jas býynnyń áleýetin arttyrýǵa, jahan jurtyna ortaq ótkir máselelerde birlese qamdanýǵa yqpal etedi. Bastysy – álemge etnosaralyq kelisim men jalpyulttyq birlikti nyǵaıtýda otandyq biregeı tájirıbe usynylady.
«Búginde jastar qanatynyń halyqaralyq qyzmetin damytý qoǵamdyq dıplomatııanyń elementi sanalady. Taıaýda Syrtqy ister mınıstriniń orynbasary Álibek Baqaevpen kezdesip, osy máseleni jan-jaqty talqyladyq. Bul ózara qadam elimiz jastarynyń halyqaralyq mádenı, ǵylymı jáne bilim baǵdarlamalaryna qatysýyna, jańashyldyqqa bastaıdy dep senemiz. Ári bul IýNESKO-nyń mádenıetaralyq dıalogti damytý baǵdarlamalaryna tartýǵa múmkindik beredi. Bastama QHA-nyń 30 jyldyǵyna oraılastyrylǵan», dedi «Assambleıa jastary» RQB tóraǵasy Tımýr Jumyrbaev.
Baǵdarlasaq, IýNESKO jobalarynyń basym kópshiligi jastar belsendiligin damytýdy kózdeıdi. Máselen, álemniń túkpir-túkpirinen kelgen stýdentterdiń uıymnyń shtab-páterindegi taǵylymdamalarǵa, jastar forýmy sekildi túrli halyqaralyq is-sharaǵa qatysý múmkindigi bar. Tipti ortalyqtyń mádenı jobalaryn iske asyrýǵa sep bola alady. Onyń biri – jas zertteýshilerge granttar úlestiretin «Jibek joly» jobasy.
«Byltyr maýsym aıynda Parıj qalasyndaǵy IýNESKO shtab-páteriniń jastar jobalary seksııasynyń basshylyǵymen alǵashqy kezdesýdi ótkizdik. Bul ózara yntymaqtastyq aıasyndaǵy jobalardy belgileýge múmkindik berdi. Sondaı-aq IýNESKO-nyń Almaty qalasyndaǵy óńirlik bıýrosymen baılanys ornatyldy. Buǵan qosa «Assambleıa jastary» uıymynyń seriktesi Ulttyq Delfıı komıtetine IýNESKO Klýby mártebesin berý talqylandy. О́tken jyly kreatıvti jastardy qoldaý maqsatynda «Jastar jalyny» Folk&Art performance» jobasyn bastadyq. Onda túrli etnos ókilderi otandyq sazgerlerdiń klassıkalyq shyǵarmalaryn usyndy. Jas talanttarǵa halyqaralyq konkýrstarǵa qatysý jáne Qazaqstannyń mádenıetin shetelde tanystyrý úshin uıymnyń granttary tabystaldy», dedi T.Jumyrbaev.
«Assambleıa jastary» uıymy el jastarynyń álemdik deńgeıdegi áleýetin arttyryp keledi. Germanııa, Úndistan, Qyrǵyzstan, Reseı, Túrikmenstan, О́zbekstan, Fransııadaǵy is-sharalarǵa belsendi qatysyp, mádenıetaralyq kommýnıkasııany, túrli áleýmettik jobany ilgeriletýde bastamashy bolyp júr.
«Mamyr aıynda Berlınge resmı issaparmen bardyq. Uıymnyń halyqaralyq qyzmetin damytý maqsatynda Germanııanyń qoǵamdyq uıymdary ókilderimen birqatar kezdesý ótti. Onda jastar saıasaty salasyndaǵy birlesken bastamalardy iske asyrý joldary talqylandy. Sondaı-aq Berlın federaldyq jeri О́kilder palatasynyń múshesi Katarına Sengemen júzdestik. Qazaqstan men Germanııa jastaryna ortaq máseleler, jobalar týrasynda áńgimelestik. Issapar aıasynda Qazaqstannan alǵash ret jastar isteri boıynsha Eýropalyq basqarýshy komıtet bıýrosynyń quramyna saılandym. Bul jetistik Qazaqstan men Eýropa jastarynyń ıntegrasııasyn kúsheıtýge jol ashady. Uıym Ortalyq Azııanyń jastar qaýymdastyǵymen yntymaqtastyqty nyǵaıtýǵa da erekshe nazar aýdarady. Aımaq memleketterimen mádenı, tarıhı, bilim salasy boıynsha birlesken jobalarymyz bar. Qyrkúıek aıynda Almaty qalasyndaǵy Qazaqstan halqy Assambleıasynyń jastar lageri aıasynda Qyrǵyzstan, Tájikstan, Túrikmenstan jáne О́zbekstan jastar uıymdary ókilderimen basqosamyz», dedi QHA múshesi Ýálıhan Bahretdınov.
Jastar ekonomıkanyń damýyna, elimizdiń áleýmettik salasy men mádenı ómirine belsendi úles qosyp keledi. Olar túrli ınnovasııa men jańǵyrtýǵa jaýapkershilik arqalap, qoǵamdyq turaqtylyqty nyǵaıtýǵa yqpal etip otyr.
