Is-sharany Almaty oblysynyń dene shynyqtyrý jáne sport basqarmasy men Almaty oblystyq dene shynyqtyrý jáne sportty damytý ortalyǵy uıymdastyrdy. Sharaǵa sańlaq sportshynyń anasy men týystary, qazaqstandyq grek-rım kúresi palýany, 2008 jylǵy Beıjiń Olımpıadasynyń kúmis júldegeri, eki dúrkin Azııa chempıony Nurbaqyt Teńizbaev bastaǵan jerlesteri men jattyqtyrýshylary Jumahan Turǵanbekov pen Berik Jańabatyruly jáne jankúıerleri qatysyp, baıraqty básekede el namysyn qorǵaǵan batyr ulyn zor qoshemetpen qarsy aldy.
Qazaq halqynyń mereıin asqaqtatqan kúni Olımpıada jeńimpazyn Almaty oblysynyń ákimi Marat Sultanǵazıev quttyqtady. Ol Demeý Jadyraevtyń jetistiginiń mańyzdylyǵyn aıta kele, 77 keli salmaqta jerlesimizdiń jeńip alǵan kúmisi – qazaq kúresi úshin tarıhı oqıǵa ekenin atap ótken edi.
Tórtkúl dúnıe kóz tikken jazǵy Olıpıadada kók Týymyzdy kókte jelbiretken Demeý Jadyraev Jetisý oblysy, Panfılov aýdany, Úsharal aýylynda dnıege kelgen. Ol 12 jasynan kúrespen aınalysa bastaǵan. Sodan bergi tynymsyz jattyǵýlar men jarys joldarynda aıtarlyqtaı jetistikterge qol jetkizdi. Atap aıtsaq, Demeý Jadyraev Azııa chempıony, Qazaqstan Respýblıkasynyń eńbek sińirgen sport sheberi, Qazaq sport jáne týrızm akademııasynyń sheberi, áskerı qyzmetkerler arasynda Azııa jáne álem chempıonattarynyń qola júldegeri atandy.
«Balamdy qarsy alýǵa jan-jaqtan jıylǵan qaýymǵa rızashylyǵymdy bildiremin. El namysyn qorǵar urpaqtarymyz kóp bolsyn. Halqyma, el-jurtyma amandyq tileımin», – dep aǵynan jaryldy júldegerdiń anasy Kúlıpa Bıjanova.
Eske salar bolsaq, Parıjdegi Olımpıada oıyndarynda Jadyraev sheshýshi beldesýde japondyq ataqty palýan Nao Kýsakamen kezdesti.
Qarqyndy kúreske qaramastan, qorytyndy esep 5-2 Nao Qýsakanyń paıdasyna berilse de, Demeý Jadyraevtyń jetistigi otandastarymyzdy zor qýanyshqa keneltip, kúmis medal enshiledi.
Oǵlan batyrymyz Jadyraev shırek fınalda qyrǵyzstandyq Aqjol Mahmýdovty sensasııalyq jolmen jeńse, jartylaı fınalda ázirbaıjandyq Sanan Sýleımanovty 6:1 esebimen utty.
Almaty oblysy
