Foto: Kaspi bank-tiń baspasóz qyzmeti
Sybaılas jemqorlyqqa qarsy qyzmet agenttigi Q. Satybaldyulyna qatysty «Qazaqtelekom» AQ, «Kólik servıs ortalyǵy» AQ qarajatyn asa iri mólsherde jymqyrý, qylmystyq jolmen alynǵan aqshany jáne ózge de múlikti zańdastyrý (jylystatý), sondaı-aq onyń baqylaýyndaǵy kompanııanyń kedendik bajdardy tóleýden jaltarý faktileri boıynsha qylmystyq isterdi tergedi.
Tergeý barysynda ol óz kinásin tolyq moıyndap, kelitirilgen zalaldy tolyq ótegeni anyqtaldy.
«2022 jyldan bastap qazirgi ýaqytqa deıin Q. Satybaldyuly jáne onymen baılanysty tulǵalardan memleketke zańsyz satyp alynǵan 732,8 mlrd teńge nemese 1,6 mlrd AQSh dollarynan astam somaǵa múliktik aktıvter men aqshalaı qarajat qaıtaryldy. Onyń ishinde 661,5 mln AQSh dollary shetelden tabyldy, olar qysqa merzimde Qazaqstanǵa qaıtarylǵan. Q. Satybaldyulymen belsendi yntymaqtastyq nátıjesinde Avstrııa, Lıhtenshteın, BAÁ, Túrkııa jáne t. b. elderden qaıtaryldy», delingen agenttik habarlamasynda.
Q. Satybaldyulyna qatysty qylmystyq ister boıynsha sotqa deıingi tergep-tekserý barysynda qaıtarylǵan aktıvterdiń jalpy somasy 732,8 mlrd teńgeni quraǵan.
1. «Qazaqtelekom» AQ aksııalarynyń 28,8% - 93,8 mlrd tg.
2. «KSO» AQ – 30,2 mlrd tg.
3. 4 kompanııadaǵy qatysý úlesi – 10,3 mlrd tg.
4. Qazaqstandaǵy múliktik aktıvter – 158,5 mlrd tg.
5. Eksklıýzıvti zergerlik buıymdar – 105,39 mlrd tg. (230 mln.$)
6. Qazaqstandyq shottardaǵy aqsha – 36,8 mlrd tg.
7. Avstrııadan kelgen aqsha – 36,8 mlrd tg. (82,1 mln.$)
8. Lıhtenshteınnen túsken aqsha – 116,7 mlrd tg. (260,5 mln.$)
9. BAÁ-den kelgen aqsha – 6,3 mlrd tg. (14 mln.$);
10. Túrkııadan kelgen aqsha – 2,2 mlrd tg. (4,92 mln.$);
11. Baǵaly qaǵazdardy satý – 135,8 mlrd tg. (300 mln dollar).
Sondaı-aq Astana jáne Almaty qalalarynda memleketke berilgen ákimshilik ǵımarattardyń jalpy aýdany 180 myń sharshy metrden asady.
Buryn bul aktıvter jalǵa berilip, jyl saıyn menshik ıesine mıllıardtaǵan tabys ákelgen, ony qazir memleket alýshy boldy.
Qaıtarylǵan lıýks nysandarynyń biri – Aqmola oblysynyń Barap aýylynda jalpy aýdany 1,5 myń sharshy metr jer ýchaskesi. Al 135 gektarlyq Q. Satybaldyulynyń burynǵy rezıdensııasy Astana qalasynyń Bilim basqarmasyna berilgen.
Agenttik bul qarajattar memleketke qaıtarylyp, áleýmettik maqsattarda paıdalanýǵa baǵyttalatynyn málimdedi.
