Ybyraı Átembekuly 1880 jyly týǵan. Jas kúninen Amangeldi, Keıkimen birge júrip, jaqyn dos bolǵan. 1916 jyly Torǵaıdyń ıgi jaqsylary Ábdiǵapardy – han, Amangeldini sardar etip saılaǵanda, el ishinde batyldyǵymen, erjúrektigimen kózge túsken Átembektiń Ybyraıyn myńbasyǵa usynǵan. Ol óz sarbazdarymen Kúıik, Shoshqaly, Doǵal shaıqastarynda bes qarýy saı jazalaýshy otrıad áskerine birese tutqıyldan, birese qasha júrip soqqy berip, olardy kóp shyǵynǵa ushyratqan. Ásirese Átembekuly basqarǵan qol Torǵaı qalasyna shabýyl jasaǵanda, eren erliktiń úlgisin kórsetken. Sondaı-aq ol 1918 jyly Orynborda ótken sezge Torǵaı ýezinen delegat bolyp qatysqan. 1924 jyldan bastap, birneshe jyl Batpaqqara (Amangeldi) aýdandyq mılısııa bólimin basqarǵan. Odan keıin ujymsharda basqarma, ferma meńgerýshisi sekildi qyzmet atqarǵan. Uzaq ómir súrip, 1969 jyly 89 jasynda dúnıe salǵan.
Y.Átembekuly 1961 jyly Qostanaı oblystyq tarıhı-ólketaný mýzeıiniń qoryna óziniń 1916-1919 jyldary ustaǵan jeke qarýy – naızasy bar myltyǵyn, aǵashtan kúıdirip jasaǵan almurt tárizdi oqshantaıyn jáne bylǵary beldigin tapsyrǵan. Qazir bul jádigerler atalǵan mýzeıdiń qundy murasy sanalady. Arqalyqtaǵy Dala ólkesi tarıhy mýzeıinde turǵan myńbasynyń kise beldigi de – sondaı baǵaly dúnıeniń biri.
Aıtpaqshy, asa kórnekti qylqalam sheberi Ábilhan Qasteev Amangeldi Imanovtyń portretin salý úshin Torǵaıǵa barǵanda sardardyń syrtqy beınesin sıpattaýǵa Y.Átembekulynyń kómegi kóp tıgen. Bul týraly sýretshiniń ózi: «Batyrdyń kelbetin somdaýda maǵan onyń bet-beınesi, minezi, bolmysy týraly kóterilis myńbasylary Áljan Qarabaev pen Ybyraı jáne onyń baýyry Serikbaı Átembekovter jaqsy aıtyp berdi», dep jazǵan eken.
