Jastar praktıkasy boıynsha jumys tapqandardyń basym bóligi – elimizdiń ońtústigindegi óńirlerden. Atap aıtqanda, Túrkistan oblysynan – 2,9 myń, Jambyl oblysynan – 1,6 myń, Shymkent qalasynan – 1,2 myń jáne Qyzylorda oblysynan 1,1 myń adam jumysqa turdy. Sonyń ishinde jastar praktıkasyna qatysqan áıelderdiń úlesi 9,3 myń adamdy (63,3%), aýyl turǵyndarynyń úlesi 8,6 myń adamdy (58,1%) quraıdy.
Alǵan mamandyǵy boıynsha bastapqy jumys tájirıbesin alý maqsatynda bilim uıymdarynyń 35 jastan aspaǵan jumyssyz túlekteri jastar praktıkasyna qatysa alady. Jastar praktıkasyna qatysý úshin Mansap ortalyǵyna ótinish berý qajet. Jumys berýshi jastar praktıkasyna qatysýshylarǵa kásibı bilim men jumys tájirıbesin berý úshin tálimgerdi bekitedi.
Respýblıka boıynsha ortasha jalaqy mólsheri – 109,5 myń teńgeni, Aqtóbe oblysynda eń joǵary kórsetkish 120,9 myń teńgeni qurady. Jastar praktıkasyn qarjylandyrýdy «Eńbek» mobıldi ortalyǵy «Azamattarǵa arnalǵan úkimet» memlekettik korporasııasy arqyly aı saıynǵy jalaqy tóleý arqyly júzege asyrady. Jalaqyny jumys berýshi usynǵan málimetter negizinde ekinshi deńgeıdegi bankterde ashylǵan qatysýshylardyń kartochkalyq shottaryna aýdarady.
Jastar praktıkasy arqyly jumysqa ornalastyrylǵandar arasynda eń kóp suranysqa ıe mamandyqtarǵa toqtalsaq, 1 084 adam – meıirger, 767-si – zańger, 558-i – tárbıeshi, 541-i – bastaýysh synyp muǵalimi, 524-i – baǵdarlamashy.
Jalpy, memlekettik qoldaýdyń bul is-sharasyna jastar jaǵy rızashylyǵyn bildirip, ájeptáýir ıgiligin kórip jatyr. Solardyń biri Dana Ahmetova kolledjdi bitirgennen jastar praktıkasy boıynsha jumysqa ornalasty.
«Bıyl Qostanaı joǵary medısınalyq kolledjin «Feldsher» mamandyǵy boıynsha bitirdim. О́z betinshe jumys tabýǵa tyrysqanymmen, kóptegen jumys berýshi jumys tájirıbesi joq jas mamandardy alǵysy kelmeıtinin túsindim. О́zime unaıtyn jumys ornyn tabý úshin Mansap ortalyǵynyń kómegine júgindim. Barlyq qajetti aqparatty alyp, jastar praktıkasyna qatysýǵa sheshim qabyldadym. Qazirgi ýaqytta Qostanaı qalasynyń temirjol aýrýhanasynda óz mamandyǵym boıynsha jumys isteımin», dedi Dana.
