Foto: khabar.kz
Keıingi jyldary memleket ana men bala densaýlyǵyna kóptep kóńil bóle bastady. Nebir emi kúrdeli aýrýlarmen alysqan analar balasyn baýyryna basty. Qursaqtaǵy balanyń da týabitti aýrýlaryn anyqtap, tipti týǵanǵa deıin de operasııa kórgen náresteler bar. Patologııasy bar balalar jergilikti aýrýhanalarda emes, iri ortalyqtarda dúnıege keledi. Bul jolǵy úsh operasııany ortalyq dárigerleri Mınsk respýblıkalyq ǵylymı-tájirıbelik «Ana men bala» ortalyǵy fetaldy medısına bólimshesiniń meńgerýshisimen birge jasaǵan. Naýqastar, ıaǵnı úsh júkti áıel Almaty oblysynan, qalanyń ózinen jáne Aqmola oblysynan kelipti.
Operasııa barysynda dárigerler «feto-fetaldy transfýzııa sındromynan (FFTS) asqynatyn kópuryqty júktilik kezindegi balanyń joldasy anastomozynyń lazerli koagýlıasııasy» dep atalatyn tásildi qoldanǵan. Bul ádis – uryqtar arasyndaǵy tamyrlardyń patologııalyq birigýin joıýǵa kómektesedi. Esesine qatty asqynýdyń aldyn alyp, egizderdiń ómirin saqtaýǵa múmkindik týady. Dárigerler ıek artqan ekinshi ádis «sharana suıyqtyǵy patologııasy bolǵan jaǵdaıdaǵy amnıoredýksııa jáne amnıoınfýzııa» dep atalady. Bul prosedýralar uryqtyń damýyna qolaıly jaǵdaı jasaıdy. Asqyný qaýpin azaıta otyryp, sharana suıyqtyǵy mólsherin retteýge kómektesedi. Úshinshi ádis – «uryqtyń búırek patologııasy bolǵanda qýyqty drenajdaý». Bul operasııa uryqta nesep aıdaý júıesiniń durys jumys isteýin qamtamasyz etedi. Ári onyń durys damý múmkindigin jaqsarta otyryp, búırek jetispeýshiligi asqynýynyń aldyn alady.
Dárigerler den qoıǵan úsh operasııa da sátti jasaldy. Naýqastardyń jaǵdaıy dál qazirgi sátte turaqty. Mamandar olardyń júktilik kezindegi densaýlyǵyn, uryqtyń odan ári durys damýyn jiti qadaǵalaıdy.
Bul operasııalar densaýlyq saqtaý mınıstrligi qolǵa alǵan «Fetaldy medısına» jobasy arqyly iske asypty. Endi eldegi aqjaýlyqtylar álemdik standarttarǵa saı keletin joǵary tehnologııalyq kómekti tegin alyp, dúnıege deni saý bala ákelý múmkindigin aıtarlyqtaı artady dep oılaımyz. Qoryta kele, jobanyń ozyq medısınalyq tehnologııalarǵa qoljetimdilikti ulǵaıtýǵa jáne júkti áıelderdiń bosanar aldyndaǵy kómek deńgeıin jaqsartýǵa baǵyttalǵanyn da aıta ketkenimiz jón bolar.
