Foto: Ashyq derekkóz
Saltanatty is-sharada óńir basshysy Erbol Qarashókeev jerlesteriniń atynan bylǵary qolǵap sheberin Olımpıada oıyndaryndaǵy kúmis júldesimen quttyqtady.
«Nurbek tórt jyldyń basty dodalarynda abyroımen óner kórsetip, halyqtyń joǵary senimin aqtady. Qasıetti Áýlıe-Ata – elimizdiń sporttyq áleýetin aıǵaqtaıtyn erekshe óńir. Álemdik arenada Qazaqstan namysyn qorǵap júrgen sportshylardyń deni Jambyl oblysynyń týmalary. Jambyl – chempıondardyń týǵan jeri, myqty bapkerlerdiń ordasy», dep atap ótti óńir basshysy sportshynyń ata-anasy men bapkerine rızashylyǵyn bildirip.
Sonymen qatar Erbol Qarashókeev Olımpıada júldegerine demeýshiler esebinen satyp alynǵan Hyundai Sonata avtokóliginiń kiltin tabys etti.
«Týǵan jerimiz Jambyl oblysyna keldik. Ystyq yqylaspen kútip alyp, qoldap jatqandaryńyzǵa rahmet. Úlken belester alda, munymen toqtamaımyz. Kelesi Olımpıada oıyndarynda qazaq elin qýantamyn dep oılaımyn», dedi Nurbek Oralbaı.
Aıta keteıik, saltanatty is-sharada oblystyq máslıhattyń tóraǵasy Abdaly Nuralıev, Jambyl oblysynyń sport ardagerleri keńesiniń tóraǵasy Taýyrbek Qaraýyltegi, Qazaqstan Respýblıkasynyń eńbek sińirgen jattyqtyrýshysy Damır Býdanbekov te sóz sóıledi.
Eske sala keteıik, osyǵan deıin Astana qalasynyń ákimi Jeńis Qasymbek Nurbek Oralbaıǵa Land Rover Defender avtokóliginiń kiltin, al jattyqtyrýshysy Asqar Erkebaevqa 10 mln teńgeniń sertıfıkatyn tabystaǵan edi.
