Sýretti túsirgen – Erlan OMAR, «EQ»
Mańyzy joǵary V Dúnıejúzilik kóshpeliler oıyny is-sharasynyń elimizde ótýi týraly alǵashqylardyń biri bolyp Vetnamnyń «Communist Party Of Vietnam» elektrondyq gazeti aqparat jarııalady. Keıinirek Eýropanyń «Commonspace.eu» saıty Qazaqstannyń kóshpeliler oıynyn ótkizetinin, bul baǵytta jetken jetistikterimizdi habarlady. Qytaıda «Young Pioneer Tours» atty qoǵamdyq uıym bar. Uıymnyń aqparattyq resýrsy dúbirli dodanyń ańdatpasy, álem elderi is-sharadan ne alatyny týraly, nelikten bul oıyndarǵa qatysý kerek ekenin taldap, saraptamalyq materıal usynsa, Ulybrıtanııanyń keıbir basylymdary oıynǵa qatysty sold-out (satylym boljamy) zertteý júrgizgen. Brıtandyq tanymal «Wanderlust» reıtıngtik jýrnaly elimizdegi oıyndy tamashalaýǵa tıis is-sharalar tizimine qosqannan beri aıtýly dodalar bıletteriniń satylymy ulǵaıǵan.
Sheteldik saıttarda («Responsible Travel», «YellowWood Adventures», «Wild Frontiers» t.b.) Dúnıejúzilik kóshpeliler oıyndaryn tamashalaýǵa kelýshiler úshin saıahat quny 2 399-2 999 fýnt sterlıng aralyǵynda ekenin jazǵan. «Wild Frontiers» týrıstik agenttiniń bloginde kóshpeliler oıyndary men elimizdiń kórikti jerlerine joǵary baǵa berilgen birneshe pikir jarııalandy. Heılı Klıter «The unique nomadic sports you’ll see at the world nomads games» atty maqalasynda: «Álem qazir jazǵy Olımpııa oıyndaryna qyzý daıyndalyp jatyr, alaıda bıyl bizdiń boıymyzdaǵy qanymyzdy oınatatyn naǵyz sporttyq oqıǵa – V Dúnıejúzilik kóshpeliler oıyny» dep jazyp, etnosport oıyndaryn tamashalaýǵa shaqyrdy.
Saıası ǵylymdar doktory Stıýart Mıýrreı «Georgetown Journal of International Affairs» atty suhbatynda atalǵan jarystyń memleketter dostastyǵyn nyǵaıtyp, dıplomatııalyq qarym-qatynasty jaqsartýdyń jarqyn úlgisi ekenin tilge tıek etken. Astananyń kóshpeliler oıyndaryn ótkizý eldegi týrızmdi óristetip, ózindik ımıdjdi qalyptastyrýǵa oń áser etetinin aıtady.
Rashıd KEMELBEK,
L.Gýmılev atyndaǵy EUÝ-dyń 4-kýrs stýdenti
