foto: diapazon.kz
M.Jumabaev aýdanynyń polısııa bólimine Gavrıno aýylynyń mańyndaǵy ormanda myltyq atylǵany týraly habarlama kelip tústi.
Oqıǵa ornyna dereý jetken ýchaskelik ınspektorlar orman alqabynan ıesiz qalǵan Ýral motosıklin jáne aǵashqa ilingen elik etin taýyp aldy.
Motosıkldiń júk salǵyshynda 12 kalıbrli 10 patron bolǵan. Qaskúnemniń ózi qyzmettik avtokólikti kórip qashyp ketken kórinedi.
«Qylmysty ashýǵa aýdandyq polısııa bóliminiń barlyq jeke quramy jumyldyryldy. Jedel-izdestirý sharalarynyń nátıjesinde 40 jastaǵy Petropavl qalasynyń turǵyny anyqtaldy. Kúdiktiden tirkelmegen myltyq tárkilendi. Qazirgi ýaqytta zańsyz ań aýlaý faktisi boıynsha tergeý amaldary júrgizilip, qajetti saraptamalar taǵaıyndaldy», dedi polısııa bólimi bastyǵynyń m.a. Janat Rahmetov.
Qylmystyq zańnama talaptaryna sáıkes kúdikti 3 jylǵa deıin bas bostandyǵynan aıyrylýy múmkin. Jyl basynan beri Soltústik Qazaqstan oblysynda zańsyz ań aýlaýdyń 6 faktisi tirkelgen.
