Foto: Qorǵanys mınıstrligi
Qarýly kúshterdiń qyzmetshileri sportshy-nusqaýshylar Narıman Qurbanov pen Demeý Jadyraev, sondaı-aq qatardaǵy jaýynger Islam Sátbaev vedomstvolyq «El qorǵany» medalimen marapattaldy. «Qarýly kúshterdiń úzdigi» medalimen Olımpıada oıyndaryna qatysýshy OSK sport rotasynyń jaýyngeri boksshy Muhammedsabyr Bazarbaıuly nagradtaldy. Sportshylardyń jattyqtyrýshylarynyń da eńbegi elendi. Al qalǵan qatysýshylar aqshalaı syıaqy ıelendi.
Olımpıadaǵa Qorǵanys mınıstrligi Ortalyq sport klýbynyń 21 sportshysy boks, dzıýdo, atý, badmınton, eskek esý, sporttyq gımnastıka, kúres, sporttyq alpınızm, taekvondo, zamanaýı bessaıys jáne jeńil atletıka sekildi 11 sport túrinen qatysty.
Sportshylardy quttyqtaǵan qorǵanys vedomstvosynyń basshysy general-polkovnık Rýslan Jaqsylyqov armııa sportshylary Qarýly kúshterdegi sporttyń damýyna úlken úles qosyp jatqanyn atap ótti.
– Jaqyn arada jastar úshin áskerı-sport kolledjin ashýdy josparlap otyrmyz. Biz ol úshin barlyq qajetti jaǵdaılardy jasaımyz jáne jas sportshylarǵa barynsha qoldaý kórsetemiz. Bul armııa sporty men Ortalyq sport klýbynyń damýyna jańa serpin beredi, – dedi Qorǵanys mınıstri.
Esterińizge sala keteıik, Fransııa astanasynda armııa sportshylary tórt Olımpıada medalin jeńip alǵan bolatyn. Olardyń qatarynda kúmis medal ıegerleri gımnast Narıman Qurbanov pen grek-rım kúresiniń balýany Demeý Jadyraev, sondaı-aq qola medal ıelengen dzıýdoshy aǵa leıtenant Ǵusman Qyrǵyzbaev pen surmergen qatardaǵy jaýynger Islam Sátbaev bar.
Táýelsizdik jyldarynda Qarýly kúshterdiń sportshylary 39 ret Olımpıada oıyndarynda jeńimpaz jáne júldeger atandy. Álemdik dodalarda olar 637 altyn, 420 kúmis jáne 489 qola medal jeńip aldy.
