Foto:Týrızm jáne sport mınıstrligi
Otyrysqa Prezıdent Ákimshiliginiń, Úkimet apparatynyń, depýtattyq korpýstyń ókilderi, sala ardagerleri, Olımpıada júldegerleri, qurmetti bapkerler, óńirlik basqarmalardyń, federasııalardyń, vedomstvoǵa baǵynysty uıymdardyń basshylary, sonymen birge BAQ ókilderi qatysyp otyr.
Jıynda mınıstr Parıj Olımpıadasynyń nátıjesi kóńil kónshitpeıtinin aıtty. Onyń ishinde Qazaqstan úshin dástúrli sanalatyn sport túrlerinen kórsetkish nashar dep baǵalady.
«Máselen, bokstan erler quramasy Olımpıada aldynda kemi 1 altyn, 1 kúmis, 1 qola mejesin qoıǵan edi. Is júzinde tolyq quramda barǵan er boksshylarymyz 1 ǵana kúmis medal enshiledi», dedi Ermek Marjyqpaev.
Sondaı-aq Parıjdegi Olımpıada oıyndaryna 8 lısenzııa ıelengen jeńil atletıka komandasy da laıyqty nátıje kórsetpegenin tilge tıek etti. Keminde 1 kúmispen oralýǵa nıet etken jeńil atletshilerdiń eń úzdik nátıjesi 9-oryn bolǵan.
«Mindettemelerge sáıkes erkin kúres komandasy qola medal alýǵa ýáde bergen edi. Alaıda sportshylar shırek fınalǵa óte almaı, birinshi aınalymnan shyǵyp qaldy. Tipti medal jeńip alý jaǵynan eń sátsiz degen Tokıo Olımpıadasynda qola medal boldy. Tarıhta alǵash ret áıelder kúresinen sportshylar Oıyndarǵa qatysqan joq. Buryn bizde dástúrli túrde jaqsy pozısııalar bolǵan», dedi mınıstr.
Ermek Marjyqpaev óńirlerdiń Olımpıadalyq rezervti daıarlaý jaǵdaıyna da toqtaldy. Parıj Olımpıadasyna birde-bir sportshy joldama ala almaǵan Qostanaı, Ulytaý jáne Mańǵystaý oblystaryn synǵa aldy.
«Ulttyq quramaǵa 17 óńirdiń sportshylary kirdi. Almaty (17), Astana (14) jáne Shymkent (12) ókilderi kóp joldamaǵa ıe boldy. Sondaı-aq Qaraǵandy sport mektebi júldegerler daıarlaý qarqynyn báseńdetip aldy. Olımpıada tarıhynda bul óńir Qazaqstanǵa 2 altyn, 1 kúmis, 3 qola syılaǵan edi. Bul joly úmit artqan qaraǵandylyq sportshylar da medalsyz oraldy», dedi mınıstr.
Vedomstvo basshysy Pavlodar oblysyndaǵy sporttyq kórsetkishter de máz emes ekenin atap ótti. Atalǵan óńir sportshylary Rıo - 2016 Olımpıadasyna qatysý úshin 7 lısenzııaǵa qol jetkizgen bolsa, Tokıoda ótken tórtjyldyqtyń basty básekesine 4 joldama alǵan. Al Parıjdegi dodaǵa tek 1 lısenzııa ıelengen.
Ermek Marjyqpaev jergilikti atqarýshy organdar olımpıadalyq sport túrlerine basymdyq berip, salany damytý saıasatyn qaıta qaraýy qajet ekenin aıtty.
«Qazirden bastap múddeli taraptarmen birge aqparattyq-túsindirý jumystaryn júrgizý kerek. 6 aıdan keıin Harbınde 9-shy Qysqy Azııa oıyndary ótedi. Mılan men Kortına-dampesso qalalarynda ótetin 25-shi Qysqy Olımpıada oıyndaryna da az ýaqyt qaldy. Ulttyq quramanyń daıyndyǵyn kúsheıtý qajet», dedi mınıstr.
