Tamyzdyń tamyljyǵan demalys kúnderiniń birinde qor quramyndaǵy kompanııalardyń jastar keńesteriniń eriktileri «Býrabaı» ulttyq parkinde eko-ploggıng ótkizýge attandy. Mundaǵy maqsat – jerlesterimizdiń eń súıikti demalys ornyn tazalaý. Kún saıyn jaǵalaýdan 10 tonnadan asa turmystyq qaldyq shyǵarylady. Eger qorshaǵan ortaǵa qaldyrylǵan qaldyq túrleriniń qansha ýaqytta ydyrap joıylatynyn esepter bolsaq, onda óz urpaǵymyzǵa qandaı «mura» qaldyryp jatqanymyzdy oılap, eriksiz qynjylasyń.
Mine, sondyqtan «Samuryq-Qazyna» AQ-nyń jastar keńesteri eko-ploggıng ótkizetin oryndy muqııat tańdady. Aqyldasa kele, is-shara uıymdastyrýshylary – qorǵa qarasty Áleýmettik ózara yqpaldastyq jáne kommýnıkasııa ortalyǵynyń qyzmetkerleri tazalyq jumystaryn Býrabaı kóliniń boıynda júrgizýge sheshim qabyldady. Bes avtobýsqa jaıǵasqan 120 adam demalys ornyna jetisimen tazalyq jasaqtaryna bólinip, jumysqa belsendi de kóńildi kirisip ketti. Eki kún ishinde erikti jastar aýmaqty turmystyq qaldyqtardan tazartty. Jumys úsh baǵytta júrgizildi: Abylaı han alańqaıynan Kókshetaýdaǵy sholý alańyna deıingi, Bólektaý taýynyń eteginen Bólektaý taýynyń sholý alańyna deıingi, orman sharýashylyǵy shekarasynan Aınakól kóline deıingi, kóldiń jaǵalaý aımaǵynyń boıymen Ánshi aralǵa deıingi aımaqtar. Osylaısha mádenı mura nysandary, tarıh pen sáýlet eskertkishteri, qoǵamdyq oryndar men mádenı mekemelerdiń aýmaqtary qoqystan kóz ashyp, sáni kirdi.
«Bul – aýmaqty tazartyp, aınalanyń tynysyn ashýǵa arnalǵan is-shara ǵana emes, sonymen qatar ujymnyń yntymaǵyn arttyryp, erkin áńgime-dúken qurýdyń tamasha múmkindigi. Bizge aýa raıy da qarasty. Bári belsendi jumys istep, ýaqytty paıdaly ári qyzyqty ótkizdi. Bastysy, sózben ǵana emes, isimizben de «Taza Qazaqstan» aksııasyn qoldadyq», dedi «Samruk-Kazyna Ondeu» JShS aǵa menedjeri, Jastar keńesiniń tóraǵasy Merýert Shýkýeva.
«Taza Qazaqstan senen bastalady» eko-ploggıngi estafeta túrinde óńirden óńirge taralady. Kelesi kezekte aksııa Atyraýda ótkiziletin bolsa, ári qaraı batystyń ózge óńirlerinde jalǵasyn tabady.
