Bıyl Astana medısına ýnıversıtetine 1500 astam stýdent oqýǵa túsipti. Munyń ishinde eldiń ár aımaǵynan kelgen túlektermen qosa, shet elden kelgen azamattar bar. Búginde ýnıversıtet bazasynda 2 bloktan turatyn 1418 orynǵa shaqtalǵan stýdentter úıi bar. Onda jatyn orynǵa suranys 3,6 myńǵa jetse, bıyl ýnıversıtet basshylyǵy 4 myńǵa jýyq stýdentti jatyn orynmen qamtamasyz etýge bekinipti. Esesine, qazir jataqhanada tapshylyǵy turmaq, qosymsha 400 oryn rezervte tur. Ýnıversıtet basshylyǵy bul nátıjege 10 jekelegen jataqhana ıesimen júrgizgen keshendi jumystyń nátıjesinde qol jetkizgen.
Bıyl Astana medısına ýnıversıtetine tıesili 30 myń sharshy metr aýmaq jóndeýden ótken. Mundaı iri kólemde jańǵyrtý buryn-sońdy bolmaǵan. Aıtalyq, Saryarqadaǵy oqý korpýsy kúrdeli jóndeýden ótip, onda jańarǵan akt zaly, kitaphana jáne Soworking ortalyǵy jastardyń ıgiligine berilgen. Osyǵan qosa stýdentter úıiniń 2 blogynda da jóndeý jumystary aıaqtalýǵa taıaǵan. Bıyl oqý jyly barysynda 1 blokta júrgizilip jatqan jańǵyrtý jumystary aıaqtalýy tıis eken.
Jataqhananyń ashylý saltanatyna Astana medısına ýnıversıtetiniń prorektory Dıas Saıdangazın de qatysyp, stýdentterdi aıtýly oqıǵamen quttyqtady.
«Astana medısına ýnıversıteti densaýlyq saqtaý salasyna qajetti kadrlardy daıarlaıtyn úzdik medısınalyq ustahanalardyń biri. Jyl saıyn oqý ordasyn támamdap shyǵatyn myńdaǵan maman otandyq medısınalyq uıymdarǵa jumysqa ornalasyp, ult saýlyǵyna úles qosyp keledi. Ýnıversıtet qurylǵan tustan osy kúnge deıin densaýlyq saqtaý júıesine 30 myńnan asa joǵary bilikti maman daıarlap shyǵardy. Sizder de oqýda ozat bolyp, sol bilikti mamandardyń qataryn tolyqtyrasyzdar degen úmittemin», dedi D. Saıdangazın sózin túıindep. 
