Foto: favoritnr1.com
Memleket basshysynyń zańsyz qumar oıyndarmen baılanysty qaýyp qaterlerdi beıtaraptandyrý týraly tapsyrmasyn oryndaý maqsatynda QMA-nyń bastamasymen vedomstvoaralyq kezdesý ótkizilip, zańsyz onlaın qumar oıyndarǵa jáne lýdomanııaǵa qarsy kúres máseleleri talqylandy.
Atalǵan jıynǵa Qarjy naryǵyn retteý jáne damytý agenttiginiń tóraǵasy Madına Ábilqasymova, qarjy mınıstri Mádı Takıev, týrızm jáne sport mınıstri Ermek Myrjyqpaev, Ulttyq bank tóraǵasynyń orynbasary Aqyljan Baımaǵambetov, mádenıet jáne aqparat vıse-mınıstri Qanat Iskakov qatysty.
QMA tóraǵasy Dmıtrıı Malahov jıyndy asha otyryp, qumar oıyndar men lotereıa qyzmetin retteýge baǵyttalǵan birqatar sharalardyń qoldanystaǵy zańnamada qarastyrylǵanyn atap ótti.
«Biz birlesip bul máseleni sheshý joldaryn talqylaý úshin jınaldyq. Bul qoǵam men memleket úshin óte mańyzdy jáne biz bul salada shuǵyl áreket etýimiz qajet», dedi D.Malahov.
Aıta keteıik, ótken jyly QMA Mádenıet jáne aqparat mınıstrligimen birlesip, TikTok-ta jappaı karta oıyndaryn uıymdastyrýdyń aldyn aldy. 300-den astam uıymdastyrýshy akkaýnty anyqtalyp, quqyqqa qaıshy kontenttiń efırin jedel túrde buǵattaýǵa múmkindik beretin jasandy ıntellekt engizdi.
Qazirgi ýaqytta Instagram-daǵy zańsyz lotereıalardy uıymdastyrýshylarǵa qarsy jumys júrgizilip jatyr.
Agenttik osy áreketterge qatysy bar adamdardy jaýapkershilikke tartýǵa qatań baǵyttalǵan.
QMA azamattardy zańsyz lotereıalarǵa tartatyn adamdardy anyqtaýda Mádenıet jáne sport mınıstrligine kómek kórsetýge, sondaı-aq tólenbegen salyqtardy qosymsha esepteý úshin Memlekettik kirister komıtetine aqparat usynýǵa daıyn.
Oǵan qosa, onlaın-kazınolarǵa qarsy kúres boıynsha aýqymdy júıeli jumys júrgizilip jatyr. Osy jyldyń basynan bastap 6 myńnan astam osyndaı saıttar buǵattalyp, kóshirmeleri táýlik ishinde joıyldy.
Zańsyz onlaın-qumar oıyndarǵa qarsy kúreste olardyń qarjylyq operasııalaryn toqtatý mańyzdy másele bolyp tabylady.
Sheteldik uıymdastyrýshylar qazaqstandyq oıynshylardan tikeleı aqsha qabyldaı almaıdy, sondyqtan olar jergilikti tólem uıymdary men bankterdi paıdalanady.
Alaıda, qumar oıyndar týraly jańa zań kúshine engennen keıin, ınternet-kazınoǵa jasalatyn tranzaksııalar shekteledi. Al bankter men tólem uıymdary kómek kórsetkeni úshin jaýapkershilikke tartylady.
Bul másele boıynsha QMA, Mádenıet jáne sport mınıstrligi jáne Ulttyq bank birlesip jumys istep, zańsyz aqsha aýdarymdaryn anyqtap, buǵattaýdy júzege asyrady.
Jıyn sońynda qatysýshylar qumar oıyndarǵa patologııalyq táýeldilikten jas urpaqty qorǵaýǵa baǵyttalǵan sharalar men is-qımyl algorıtimin qamtıtyn yntymaqtastyq týraly Memorandýmǵa qol qoıdy.
