Foto: inbusiness.kz
Prezıdent atap ótkendeı, jeke ınvestısııalar tartý arqyly elimizde iskerlik belsendiliktiń artýyna qolaıly jaǵdaı jasaǵan jón. Ol úshin, eń aldymen, salyq saıasaty turaqty bolýǵa tıis. Sonda bıznes te sapaly damýǵa yntaly bolady jáne jaýapkershilikpen jumys isteıdi.
Memleket basshysy jańa salyq kodeksi qazirgi júıeni qaıta jańǵyrtýǵa arnalǵanyn aıta ketti. Bul qujat salyqtyq ákimshilendirý isiniń salyq tóleýshilerge degen senimge negizdelgen múlde jańa júıesin qalyptastyrýǵa tıis.
«Kodekstiń erejelerin árkim árqalaı qabyldamaýy úshin ony jeńildetip, ekonomıkalyq turǵydan belsendi azamattyń bárine birdeı túsinikti etý óte mańyzdy. Salyq rejımderin kásipkerlerge jasalǵan qolaıly jaǵdaıdyń nasharlap ketpeýin eskere otyryp, ońtaılandyrǵan jón. Bólshek salyqtyń engizilýin mysal retinde aıtýǵa bolady. Osy normaǵa senim artqan kásipkerler qyzmetin ashyq júrgize bastady, kásipterin bólshekteýdi azaıtty. Alaıda bul rejım negizinen halyqpen tikeleı jumys isteıtin kásipkerlerge qatysty bolýǵa tıis», dep túsindirdi Qasym-Jomart Kemeluly.
El Prezıdenti tutynýshylarǵa arnalǵan qyzmetter men saýda-sattyqtyń múmkindikteri tolyq paıdalanylsa, ekonomıkany damytý, salyq túsimderin arttyrý jáne halyqty jumyspen qamtý sharalary tezirek nátıje beretinin tilge tıek etti.
«Fıskaldy reforma tabysty bolsyn desek, salyqtyq ákimshilendirý isin jappaı sıfrlandyrý kerek. Sybaılas jemqorlyqqa qatysty syn-qaterlerdi barynsha azaıtyp, salyq salasyndaǵy úderisterdiń ashyq bolýyn qamtamasyz etý úshin ony tezirek elektrondy formatqa kóshirgen abzal. Búkil salyq saıasatyn jıi ózgerip jatqan fıskaldy ahýalǵa beıimdeý kerek, sonyń ishinde salyq mólsherlemesin de qaıta qaraǵan jón», dep qosty Memleket basshysy.
