foto: economy.kz
«Elimizde memlekettik kásiporyndardy basqarý saıasaty áli de tıimsiz ekenin moıyndaǵan jón. Olardyń maqsat-mindetin, qyzmet aıasyn, qarjylandyrý tásilderin jáne jumysynyń basqa da tustaryn tıisti zańdarmen retteý qajet. Sonymen birge holdıngter men Úkimettiń arasyndaǵy qarjy máselelerine qatysty ustanym turaqty ári júıeli bolýǵa tıis», dedi ol.
Sonymen qatar, 2022 jylǵy Prezıdent Joldaýynda Qasym-Jomart Toqaev bárin basynan bastap retteýdi tapsyrǵan edi. Reformanyń birinshi kezeńiniń ózinde orynsyz ári qajetsiz 10 myńnan astam talaptyń kúshi joıyldy. Onyń bári kezinde kásipkerlerge kedergi keltirgen edi.
«Bas prokýratýra iri ınvestısııalyq jobalardy júzege asyrýǵa qoldaý kórsete bastady. Investorlarǵa «jasyl dáliz» qaǵıdasy boıynsha jeńildikter berildi. Ekonomıkalyq qylmystardyń birazy qylmys dep tanylmaıtyn boldy. Alaıda kásipkerlerden memlekettik organdardyń shekten tys qadaǵalap, baqylaıtyny týraly shaǵymdar áli de túsip jatyr. Úkimet Bas prokýratýramen birlesip, ınvestısııalyq ahýalǵa áserin tıgizetin jaǵymsyz úrdisterdi joıýy kerek», dedi el Prezıdenti.
Byltyr bıznes ókilderimen ótken kezdesý barysynda Qasym-Jomart Toqaev bul másele boıynsha naqty ustanymdy aıtqan edi.
«Biz kásip ıelerimen ózara kelisimge keldik, ıaǵnı «kapıtaldy zańdastyrý» úshin mindetti túrde Qazaqstan ekonomıkasyna qarjy salý qajet bolady. Eń bastysy, salynǵan qarjy el ıgiligine jaraýy kerek. Bul talapty normatıvtik turǵydan bekitip alý qajet», dedi ol.
Prezıdenttiń aıtýynsha, tıisti reestrge engizilgen kásipkerlermen kelisim jasaǵan kezde memleketke qaıtarylatyn aktıvterdi «zańsyz» dep tanymaý týraly normany bekitýge bolady.
«Bul – shyn máninde, iri kásip ıeleriniń múddesine saı keletin mańyzdy qadam. Biraq kásipkerler de qarjyny respýblıkalyq bıýdjetke aýdarý máselesine kelgende Úkimetpen jáne Bas Prokýratýramen tyǵyz baılanysta jumys isteýge tıis. Bul – ár teńge úshin saýdalaspaı, qajetti sharanyń bárin óz erkimen jasaý kerek degen sóz. Olar osy eldiń azamaty retinde mektep, aýrýhana, stadıon, mýzeı jáne basqa da áleýmettik-mádenı nysandar salýǵa qomaqty qarjy bólýge mindetti. Mundaı kásipkerlerdiń esimi jomart jandardyń «altyn tizimine» jazylady. Al odan bas tartqan nemese sózbuıdaǵa salǵan kásipkerlerge qatysty áńgime basqasha bolady», dedi Q. Toqaev.
