Foto: kursiv.media
Memleket basshysynyń aıtýynsha, elimizge senimdi jáne ekologııalyq taza qýat kózderin tartý asa mańyzdy. Sondyqtan, atom energetıkasyn damytý máselesine bas mán berýimiz qajet.
«Qazir álemde energııa tapshylyǵy kúsheıip barady. Elimizge senimdi jáne ekologııalyq taza qýat kózderi asa qajet. Sondyqtan biz atom energetıkasyn damytýǵa basa mán berýimiz kerek dep oılaımyn. Sebebi ekonomıkamyz kún ótken saıyn mol energııany qajet etýde. Mundaı suranysty atom energetıkasy qamtamasyz ete alady. Qazir damyǵan jáne damýshy 30 memlekette 200-ge jýyq atom elektr stansasy jumys istep tur».
Joldaýda Prezıdent atom elektr stansasyn salýǵa qatysty barynsha baıypty sheshim qabyldaý qajettigin, sondaı-aq strategııalyq josparlardy qoǵamda keńinen talqylaý kerek ekenin atap ótti.
«El ómirindegi árbir mańyzdy qadam jurtshylyqpen birlesip jasalýǵa tıis. Atom elektr stansasy týraly referendýmǵa qatysty da dál solaı bolýy kerek. Byltyr men bul másele boıynsha óz pikirimdi aıttym, ıaǵnı, referendým taqyrybynyń qoǵam talqysyna túskenine bir jyl boldy. Bul azamattarymyzdyń jan-jaqty oılanyp, salmaqty sheshim qabyldaýyna jetkilikti merzim dep oılaımyn. Sondyqtan men Úkimettiń usynysyn qoldaımyn», dedi Memleket basshysy.
Sonymen qatar, bıyl 6 qazanda Atom elektr stansasyn salý máselesine qatysty jalpyulttyq referendým ótedi. Búgin, Prezıdent Qasym-Jomart Toqaev tıisti Jarlyqqa qol qoıady.
«Atom elektr stansasyn salý máselesine qatysty jalpyulttyq referendým bıylǵy 6 qazanda ótedi. Búgin tıisti Jarlyqqa qol qoıamyn. Aldaǵy referendým keń aýqymdy jalpyulttyq dıalogtyń taǵy bir aıqyn kórinisi bolmaq. Shyn máninde, bul – «Halyq únine qulaq asatyn memleketke» tán sıpat. Biz osyndaı qadamdar arqyly jańa qoǵamdyq-saıası mádenıettiń negizin qalaımyz. Mańyzdy memlekettik sheshimder qabyldaýdyń jańa úlgisin jasaımyz», dedi Memleket basshysy.
