Sýret: primeminister.kz
Is-sharaǵa Premer-mınıstrdiń orynbasary – Ulttyq ekonomıka mınıstri Nurlan Baıbazarov, Islam damý banki tobynyń prezıdenti Muhammed Sýleıman Ál-Djasser, Arab ınvestısııalyq qorlary men elimizdiń memlekettik organdary ári kvazımemlekettik kompanııalardyń basshylary qatysty.
Kezdesýdiń basty maqsaty – Arab úılestirý tobynyń Qazaqstan úshin basymdyqqa ıe ınfraqurylymdyq jáne áleýmettik jobalardy qarjylandyrý.
«Búgin Qazaqstan Respýblıkasynda Arab úılestirý tobynyń birinshi dóńgelek ústel otyrysyn ótkizý arqyly berik ári uzaqmerzimdi yntymaqtastyq baǵytynda birlesken alǵashqy qadam jasaımyz. Qoldaýlaryńyz ben yntymaqtastyqqa daıyn bolýlaryńyz biz úshin mańyzdy elimizdiń áleýetin moıyndaý bolyp sanalady», dedi Nurlan Baıbazarov.
Dóńgelek ústel barysynda kólik, energetıka, sý resýrstary, densaýlyq saqtaý salalaryndaǵy jobalar tanystyryldy, sondaı-aq Qazaqstannyń 2030 jylǵa deıingi Ulttyq ınfraqurylymdyq jospary usynyldy.
О́z kezeginde Arab úılestirý toby delegasııasynyń ókilderi elimizdiń áleýmettik-ekonomıkalyq jáne ınfraqurylymdyq damý jónindegi kúsh-jigerin joǵary baǵalady.
Kezdesý qorytyndysy boıynsha taraptar dóńgelek ústel otyrysynyń hattamasyna, OPEK qorymen jeke sektordaǵy operasııalar týraly negizdemelik kelisimge, Sý resýrstary jáne ırrıgasııa mınıstrligi men Islam damý banki arasyndaǵy kelissózder hattamasyna qol qoıdy. Qol qoıylǵan qujattar odan ári yntymaqtastyq salalar men áleýetti jobalardyń aldyn ala tizbesin aıqyndaıdy.
Qol jetkizilgen ýaǵdalastyqtar aıasynda Qazaqstan ekonomıkasyna uzaqmerzimdi tikeleı ınvestısııalardyń somasy bastapqy kezeńde $7 mlrd quraýy múmkin. Bolashaqta qarjylandyrý kólemin ulǵaıtý josparlanyp otyr.
