Mamyr aıynyń basynda saparǵa shyqqan poıyz ujymy buǵan deıin Mańǵystaý, Atyraý, Aqtóbe, Batys Qazaqstan, Qostanaı, Aqmola, Soltústik Qazaqstan jáne Pavlodar oblystarynda boldy. 44 610 azamatty (onyń ishinde 13 034 bala) medısınalyq qyzmetpen qamtyǵan dárigerler eńbeginen tys, medıator men zańgerler 2 431 aryzdy qarastyryp, jergilikti azamattardyń quqyqtyq, eńbek kıkiljińderin sheshýge kúsh saldy. Máselen, Aýyl, Belaǵash, Tıshınskaıa jáne Cheremshanka stansalarynda poıyz zańgerleri kópbalaly otbasylarǵa, múgedekti bar adamdarǵa, zeınetkerlerge qolushyn sozyp, muragerlik, shıpajaıda emdelý, shaǵyn qarjy uıymdaryna bereshek, zeınetaqyny aldyn ala esepteý, alıment, múlikti bólý, salyq esebin tapsyrý, eńbek daýlary boıynsha aryz-shaǵymdardy zerdeledi.
«Salamatty Qazaqstan» poıyzynda zańgerlerdi kórip tańǵaldym. Medıator Sholpan Aǵzamqyzy meni muqııat tyńdap, máselemdi sheship berdi, Konstıtýsııa kúni eńbek quqyǵymdy laıyqty qorǵaı aldy. Kásibı, saýatty túrde kórsetilgen kómekke shyn júrekten alǵys aıtqym keledi», deıdi Abaı oblysynyń Aýyl stansasynda quqyqtyq keńeske júgingen kópbalaly ana. Nátıjesinde bul turǵynǵa bala kútiminen soń jumysqa shyqqanda mektepte qysqaryp qalǵan eńbek saǵattary, ıaǵnı otbasy kirisi qaıta qalpyna keltirildi.
Poıyz vagondarynda qabyldaý 13.00–14.00 túski úzilispen saǵat 09.00–18.00 aralyǵynda júrgiziledi. Azamattarda ózderimen birge jeke kýáligi bolsa jetkilikti.
Osy oraıda shyǵys aımaqta ornalasqan Altaı, Taýsamaly beketterinde poıyz janynda demeýshilerdiń qoldaýymen arnaıy qaıyrymdylyq konsertteri ótip jatyr. Konsertter legi óńirlerde jyl aıaǵyna deıin jalǵasady.
Elimizdiń barlyq óńirindegi 140 alys beket pen olardyń mańaıyndaǵy aýyl-aımaqqa tegin medısınalyq-áleýmettik kómek kórsetýge arnalǵan poıyzdyń qozǵalys kestesi shalǵaı mekenderde medısınalyq pýnktterdiń joqtyǵyn eskere otyryp jáne azamattar men memlekettik organdardyń ótinishi negizinde ázirlendi. Joba dárigerleri ortasha alǵanda ár stansaǵa 1-2 kún toqtap, aýyl turǵyndaryna alǵashqy medısınalyq-sanıtarlyq jáne konsýltasııalyq-dıagnostıkalyq kómek kórsetedi. Zerthanalyq ádisterdi qoldana otyryp naýqastardy tekseredi.
Quram qyzmetine 40 maman jumyldyryldy. Atap aıtqanda, densaýlyq kerýeninde terapevt, hırýrg, pedıatr, psıholog, nevropatolog, ýltradybystyq dıagnostıka, jalpy tájirıbe dárigeri, rentgenolog, júrek, tis, kóz, qulaq, tamaq jáne muryn dárigeri, onkolog-mammolog, gınekolog jáne ýrolog syndy bilikti dárigerler jáne kómekshi mamandar bar. Qajet jaǵdaıda dárigerler shaǵyn operasııalar júrgizip, josparly emdeýge joldama beredi. Al medıator men zańger halyqqa daýdy sotqa deıin sheshý sekildi ózekti máseleler jóninde keńes berip, azamattardyń zeınetaqy-járdemaqy, áleýmettik tólem jáne ataýly áleýmettik kómek alý týraly suraqtaryna jaýap beredi.
Áleýmettik joba Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory jáne Densaýlyq saqtaý mınıstrliginiń ózara yntymaqtastyǵy negizinde júzege asyp jatyr.
«Kóbinese shalǵaı aýyldarda aýrýhanalar bolmaıdy jáne turǵyndardyń barlyǵy kez kelgen ýaqytta aýdan ortalyǵyna bara almaıdy. Onyń ústine bıyl, barshańyzǵa belgili, birqatar óńirdi sý alyp, qıyndyq týyndady. Al medısınalyq poıyz jaǵdaıynda balalardy qaratyp, eresekterdiń ózine de barlyq mamannan birden keńes alýdyń jaqsy múmkindigi týyndady. Poıyzǵa eń zamanaýı medısınalyq jabdyqtar qoıylyp, tipti adamdarǵa shaǵyn otalar jasaý qarastyrylǵan», deıdi Alfııa Adıeva.
Jalpy, 2010–2023 jyldar aralyǵy medısınalyq poıyzdar 1 991 stansada bolyp, 658 407 adamnyń, onyń ishinde 142 660 balanyń densaýlyǵy tekserildi. Tek 2023 jyly ǵana 100 myńǵa jýyq aýyl turǵynyna aqysyz járdem jasalyp, 8 aıdyń ishinde barlyq 17 oblystaǵy 121 shalǵaı stansa qamtyldy. Osylaısha, ortasha alǵanda poıyz 18 myń shaqyrymǵa jýyq jol júrip, 88 994 azamattyń densaýlyǵyn jaqsartýǵa úles qosty. Onyń ishinde 19 222-si – bala. 9 802 adamǵa aqysyz quqyqtyq jáne medıatıvtik, ıaǵnı tatýlastyrý kómegi kórsetildi.
