Osylaısha, erekshe balalar men jasóspirimderdi sportqa tartyp, olardyń qoǵamǵa áleýmettik beıimdelýine járdem kórsetilip keledi. Máselen, paralımpıadalyq federasııalardyń tájirıbeli jattyqtyrýshylarynyń jetekshiligimen bochcha, júzý, jeńil atletıka, ústel tennısi jáne t.b. beıimdelgen sport túrlerimen tanystyryp qana qoımaı, tájirıbe júzinde meńgerýine sep beredi. Jobanyń erekshelikteriniń biri – múgedektigi bar balalarǵa ǵana emes, olardyń ata-analaryna da baǵyttalýy. Atap aıtqanda, trenıngter men semınarlar, belsendi demalys uıymdastyrý arqyly olardyń ómirge ynta-jigerin arttyrý. Ata-analarmen jumys erekshe balalarmen jumys isteýdiń negizgi arqaýy sanalady. Uıymdastyrylǵan sessııalar barysynda ata-analar tıýterler men eriktilerdiń súıemeldeýimen san alýan shyǵarmashylyq, tanymdyq, damytatyn is-sharalarmen, art-terapııamen jáne mýzykalyq terapııamen qamtyldy.
«Bizdiń erekshe jobamyz balalar men ata-analardy bir serpiltip, bolashaq ómirge daıyndaýǵa kómektesedi. Jalpy, qorymyzdyń qyzmeti ınklıýzıvti qoǵamdy damytýǵa baǵyttalǵan. Qazirgi ýaqytta qor kompanııalary toby atynan 42 ońaltý ortalyǵy ashylyp, 23 qalada myńnan asa bala aınalysatyn beıimdelgen sport seksııalary jumys isteıdi. Jaqynda ınklıýzııa salasyndaǵy 100-den asa sarapshyny oqytýdy aıaqtadyq. Sondaı-aq 180 múmkindigi shekteýli adam oqytýdan ótip, suranysqa ıe IT mamandyqtardy meńgeredi. Mektepterde ınklıýzııany qoldaý kabınetterin qurýdy josparlap otyrmyz. Bul jobalardyń barlyǵy birin-biri tolyqtyryp jatyr», dep atap ótti «Samruk-Kazyna Trust» qorynyń bas dırektory, Áıelder isteri jáne otbasylyq-demografııalyq saıasat jónindegi ulttyq komıssııa múshesi Alfııa Adıeva.
Ár maýsym saıyn lagerde tanymal paralımpıadashylar, olardyń arasynda jeńil atletıkadan Qazaqstan chempıony Aıdana Sııazova jáne júzýden parasportshy Ivan Glazyrın bolyp, jeke tabys oqıǵalary arqyly qatysýshylardy shabyttandyrdy. Lager aıasynda jasóspirimder men stýdentterden quralǵan eriktiler erekshe jandarǵa qolǵabys jasady.
«Osyndaı erekshe lagerge qatysqanymyzǵa myń alǵys. Balalar men ata-analardyń rýhy kóterilip qaldy. О́ıtkeni balalarymyzdyń kóbi úıde otyrady, al osyndaı tysqary jerde óz qatarlastarymen syrlasyp, sport túrlerin meńgerýine ne jetsin? Mamandar keńesterimen bólisip, erekshe balalardyń psıhologııasy men qajettilikteri týraly tyń aqparat aldyq. Mundaı lagerlerdiń elimizde kóptep ashylǵanyn tileımin», deıdi Ekibastuz qalasynan kelgen Aıdana esimdi erekshe qyzdyń anasy Qarlyǵash Úsinova.
Inklıýzıvti sport lageri tek demalys orny ǵana emes, munda erekshe qajettilikteri bar balalar óziniń fızıkalyq áleýetin damytyp, psıhologııalyq kedergilerdi jeńýge, óz qabiletine degen senimdilikti tabýǵa úırendi. Joba ár bala óziniń erekshelikterine qaramastan ósip, damyp, aldaǵy bolashaǵyna arman quratyn jarqyn ortaǵa aınaldy. Eń mańyzdysy da osy.
