Sýret: ashyq derekkózden
Bıylǵy Joldaýdyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty taqyryppen usynylýynyń ózi el erteńine degen senimdi nyǵaıtyp, memleket bolashaǵyna degen optımıstik úmitke ot berip otyr.
Saıası qujatta otyz jyldan astam qoldanysta bolǵan bank júıesin jetildirýge arnalǵan jańa zań qabyldaý máselesi oryndy kóterildi. Sonymen qatar elimizdiń ekonomıkalyq áleýetiniń berik irgetasyn qalyptastyrý maqsatynda jańa Salyq kodeksi aıasynda memlekettik bıýdjettiń kiris bóligin arttyra túsý joldaryn da qarastyrý týraly óte mańyzdy tapsyrmalar berildi.
Prezıdent Joldaýda barlyq salada ınvestısııalyq ahýaldy jáne bıznes júrgizýge qajetti jaǵdaıdy jaqsartý jolynda úzdiksiz jumys júrgizýdi taǵy da basa aıtty. Onyń ishinde agroónerkásip keshenine ınvestısııa tartý óte mańyzdy mindet ekenine aıyryqsha toqtaldy.
Prezıdent: «Bir sózben aıtsaq, Ádiletti Qazaqstan qurylyp jatyr. Munyń bári, eń aldymen, halyqtyń qalaýymen jasalýda. Sondyqtan biz alǵan betimizden qaıtpaımyz, baǵytymyzdan taımaımyz», dep memlekettik damý saıasatynyń naqty joldaryn aıqyndap berdi. Sonymen qatar ótken jyly bastalǵan «Aýyl amanaty» jobasynyń tabysty nátıjelerine keńinen toqtalyp, endigi jerde osy joba aıasynda taǵy bir jańa tásildi, ıaǵnı «taýar nesıesin» berý máselesin qarastyrý qajettigin kórsete kele, «Amanat» partııasynyń bastamasymen Jambyl oblysy Merki aýdanynda júzege asyrylyp jatqan osy oń tájirıbeni basqa da aımaqtarǵa taratýdy oılastyrýy kerektigin Úkimet pen ákimderge mindettedi.
Sondaı-aq Memleket basshysynyń 2025 jyldy Jumysshy mamandyqtary jyly dep jarııalaýy qoǵam ishinde úlken serpilis týǵyzary aqıqat. О́ıtkeni elimizdiń barlyq salasy qazirgi tańda orta kásibı mamandar jetispeýshiligin sezinip otyr. Al bul máseleniń tehnıkalyq jáne kásibı bilim júıesin tabysty reformalaý arqyly oń sheshimin tabaryna kúmán keltirýge bolmaıdy. Jalpy, «Adal azamat – Adal eńbek – Adal tabys» qaǵıdaty arqyly eńbek adamyna qashanda qurmet, syı kórsetip, bıikke kóterý búgingi Ádiletti Qazaqstannyń jarqyn kórinisi bolýǵa aparar jasampaz jol ekeni daýsyz.
Bulardan basqa da asa úlken keleli de ózekti máselelerdi kótergen jańa Joldaýdyń túpki maqsaty el ıgiligin arttyrýǵa, qoǵam tynyshtyǵy men yntymaqty saqtaýǵa negizdelgen.
Endigi alda turǵan asa jaýapty jumys – Joldaýda aıqyndalǵan mejeli mindetterdiń tabysty oryndalýyna barynsha yqpal etý. Joldaý sońynda Memleket basshysynyń «Ár adamǵa jáne barshaǵa birdeı múmkindik beretin memleketti, ıaǵnı Ádiletti Qazaqstandy bolashaq urpaqqa amanat etý – barshamyzǵa ortaq mindet» ekenin jarııa etýi qujatta naqtylanǵan árbir mindettiń barsha otandasymyzǵa ortaq ekenin aıqyn bildiredi.
Sáken ARÝBAEV,
Senat depýtaty
