Ulttyq ulan áskerı jasaǵy elordanyń Almaty aýdanynda qoǵamdyq tártipti qadaǵalaý kezinde esirtki zatyn tapty. Sarbazdar elektrlik taspamen oralǵan oramany alýǵa talpynǵan kúdiktini birden baıqaǵan. Áskerı jasaq bastyǵy, qatardaǵy jaýynger Nurtaı Aıtbaı, patrýldeýshi sarbazdar Sanat Turǵymbaev pen Máýlet Janymhan bul týraly baılanys quraldary arqyly dereý kezekshige baıandaıdy.
«Er adam bizdi kórgende, onyń minez-qulqy birden ózgerip, áreketi kúdik týdyrdy. Biz qujattaryn suradyq. Syrttaı tekserý kezinde polıseıler azamattan qara tústi, erekshe ısi bar untaq paketin tapty. Tártip saqshylary mán-jaıdy odan ári naqtylaý úshin oramany tárkiledi», deıdi qatardaǵy jaýynger Nurtaı Aıtbaı.
Ustalǵan adam polısııa bólimine jetkizildi. Sondaı-aq osy kúni saǵat 21:30 shamasynda qalada taǵy bir oqys oqıǵa boldy. Kelesi bir áskerı jasaq bastyǵy, qatardaǵy Nurbaq Qalabek, onyń qaramaǵyndaǵy patrýlshiler Almas Bekseıit pen Beksultan Esennen qala turǵyny 6 jasar balasyn taýyp berýlerin ótinip, kómek suraıdy.
Áskerı jasaq birden balanyń boljamdy málimetterin patrýldik top bastyǵyna habarlaıdy. Sodan keıin ulandyqtar jaqyn mańdaǵy patrýldik baǵyttarda shuǵyl izdeý sharalaryn uıymdastyrady. Áskerı qyzmetshilerdiń jedel jáne úılesimdi áreketteriniń nátıjesinde joǵalǵan bala aman-esen tabylyp, anasyna qaıtaryldy. Ulttyq ulan jaýyngerlerine izdeýdi jedel uıymdastyrǵany jáne kásibı kómekteri úshin alǵys aıtqan balanyń anasy alǵysyn bildirip, sarbazdarǵa saýlyq tiledi.
