Foto: QR Qorǵanys mınıstrligi
Merzimdi áskerı qyzmetke shaqyrýdy keıinge qaldyrýǵa nemese bosatýǵa negizderi joq 18 jastan 27 jasqa deıingi azamattar shaqyrylady.
Kúzgi shaqyrý barysynda Qarýly kúshterdiń (9 933), Ulttyq ulannyń (6 822), UQK Shekara qyzmetiniń (3 200), TJM (317) jáne Memlekettik kúzet qyzmetiniń (290) bólimsheleri jasaqtalady.
Qorǵanys mınıstrligi áskerge shaqyrýdy esepke alý jumysyn sıfrlandyrý jumystaryn dáıekti túrde júrgizip keledi. Áskerge boryshyn óteýge shaqyrylǵan áskerı qyzmetshiler týraly málimet almasý, sondaı-aq olardy zapasqa shyǵarý avtomattandyrylǵan.
«Bıyl sarbazdarǵa arnalǵan artyqshylyqtar zań júzinde bekitildi. Olarǵa qyzmet etý kezinde jáne áskerden bosatylǵannan keıin eki aı ýaqytqa nesıelik demalys beriledi. Búgingi tańda 6 myńnan astam áskerı qyzmetshiniń 1 mlrd 828 mln teńge somasyndaǵy tólemderi keıinge qaldyryldy. Sonymen qatar kredıttiń bolýyn ne bolmaýyn, ol boıynsha tólemdi keıinge qaldyrýdy belgileý Qarjy naryǵyn retteý jáne damytý agenttigi aıqyndaǵan tártippen Qorǵanys mınıstrliginiń, kredıttik bıýrolar men kredıtorlardyń aqparattyq júıeleriniń ózara is-áreketi arqyly júzege asyrylady», delingen mınıstrlik habarlamasynda.
Aıta keteıik, Otan aldyndaǵy boryshyn ótegen azamattarǵa stýdenttik jataqhanadan oryn berý jeńildikteri de qarastyrylǵan. Búgingi tańda áskerde qyzmet etken myń jarymnan astam azamat joǵary oqý oryndaryna tegin, al aqyly túrde 700-den astamy oqýǵa tústi. Osy jyldyń kókteminde zapasqa shyǵarylǵan 400-den astam áskerı qyzmetshi kelisimshart boıynsha áskerı qyzmetke ornalasty.
«Prezıdenttiń tapsyrmasy boıynsha Qarýly kúshter memlekettik úlgidegi kýálikterdi bere otyryp, áskerı qyzmetshilerdi aralas jumysshy mamandyqtaryna oqytty. Bul másele Memleket basshysynyń Qazaqstan halqyna Joldaýynda da aıtylyp, 2025 jyl – Jumysshy mamandyqtar jyly dep jarııalandy. Jyl saıyn jumysshy mamandyqtarynyń sany da artyp keledi. 2023 jyly 1200-ge jýyq maman oqytyldy. Bıylǵy jyly 1300-den asa adamdy oqytý josparlanyp otyr», deıdi vedomstvo ókilderi.
Qalalyq jáne aýdandyq shaqyrý komıssııalary jergilikti atqarýshy organdar ákimderiniń orynbasarlarynyń tóraǵalyǵymen jumys isteıtinin aıta ketý mańyzdy. Shaqyrý naýqany barynsha ashyq formatta ótkiziledi.
Áskerge shaqyrylýshylar, olardyń ata-analary, jýrnalıster, qoǵam ókilderi qajetti aqparatqa júginip, barlyq suraqtarǵa jaýap ala alady. Ár qorǵanys isteri jónindegi departamentinde «jedel jeli» men áleýmettik jelilerdegi resmı akkaýnttar iske qosylǵan.
