Foto: Álı Ǵalym
Sóz basynda Májilis Spıkeri, «AMANAT» partııasynyń Tóraǵasy Erlan Qoshanov depýtattardyń óńirlerge sapary kezinde jınalǵan halyqtyń barlyq problemalyq máselesi júıelenip, ony sheshý úshin Úkimetke joldanatynyn atap ótti. Bul jumystyń qorytyndysy jyl sońynda Májilistiń jalpy otyrystarynyń birinde ashyq qaralady.
Osy oraıda, birqatar depýtat Shyǵys Qazaqstan, Aqmola, Pavlodar, Soltústik Qazaqstan, Abaı, Jetisý oblystary turǵyndaryn tolǵandyrǵan eń ózekti máselelerdiń qatarynda UTC+5 ýaqyt formatyna kóshý ekenin atap ótti. Kezdesýler barysynda azamattar depýtattarǵa dál osy máselege baılanysty týyndaǵan qolaısyzdyqtar týraly kóp dálel keltirdi – tún ortasynda tań atady, ádettegiden áldeqaıda erte qarańǵy túsedi. Munyń bári adamdardyń kúndelikti ómirine keri áser etedi.
Buǵan qosa, bastamashyl azamattar toby osy másele boıynsha tıisti petısııa jarııalap, ol qoǵamda qyzý talqyǵa tústi. Jýyrda ótken Májilistiń plenarlyq otyrysynda bul máseleni «AMANAT» fraksııasynyń múshesi, Shyǵys Qazaqstan oblysynan saılanǵan birmandatty depýtat Luqbek Týmashınov kóterdi. Alaıda, Saýda jáne ıntegrasııa mınıstriniń atalǵan másele úsh jyldan keıin qaralady degen jaýabyn halyq qalaýlylary jetkiliksiz dep tanydy.
Atalǵan másele boıynsha depýtattar Luqbek Týmashınov, Rınat Zaıtov, Iýlııa Kýchınskaıa, Dáýlet Muqaev, Nurtaı Sabılıanov, Ashat Aımaǵambetov, Dúısenbaı Turǵanov jáne ózge de azamattar pikir bildirdi.
Osy taqyryp tóńiregindegi qoǵamdyq úlken rezonansty eskere otyryp, talqylaý nátıjesinde fraksııa depýtattary múddeli memlekettik organdardyń, ǵalymdardyń, sarapshylardyń jáne óńirlerdegi ókilderdiń qatysýymen aldaǵy ýaqytta ótetin Májilistiń jalpy otyrystarynyń birinde ýaqyt beldeýin aýystyrý máselesin ashyq qaraý týraly sheshim qabyldady. Otyrys qorytyndysy boıynsha naqty usynystar ázirlenip, ony Úkimetke usyný josparǵa alynǵan.
