Biz sóz etken araldaǵy taǵy bir kórikti jer – Etnoaýyl aımaǵy. Jospar boıynsha bul aımaqta túrli ult ókiliniń úıleri boı kóteredi. Qazirdiń ózinde zamanaýı úlgidegi balalar alańy jasalyp bitti, budan basqa da qurylys jumystary qarqyndy júzege asyp jatyr. Etnoaýyldy jaryqtandyrýǵa baǵanalar ornatylady, oryndyqtar qoıylyp, tamaq, sýsyn, kofe usynatyn saýda oryndary jumysyn bastaıdy. Buǵan qosa alańdaǵy abattandyrý jumysy men talapqa saı jańa sahna ornatylsa, ártúrli mádenı-kópshilik is-sharany ótkizetin, mereke kúnderi qala turǵyndary men qonaqtarynyń basyn qosatyn qutty orynǵa aınalady.
Qaladaǵy qurylys nysandaryn aralaǵan Abaı oblysynyń ákimi Nurlan Uranhaev bıznes ókilderimen kezdesip, «Beıbitshilik» aralynyń búgingi jaı-kúıi men bolashaǵy jóninde oıyn ortaǵa saldy. «Jerlesterimiz ben qala qonaqtary aralǵa kelgende alańsyz demalatyndaı bolýy kerek. Sol úshin árbir atqarylyp jatqan jumysty búge-shigesine deıin oılastyryp, talapqa saı jasaǵan durys. Biz óz tarapymyzdan «Beıbitshilik» aralynyń jańa keıipke enýine atsalysamyn deýshilerge qoldaý bildirýge ázirmiz. Tek jumys sapaly ári búgingi zaman talabyna laıyq bolǵany jón», dedi óńir basshysy.
Sonymen qatar Semeı qalasyndaǵy №1 emhananyń aldynda dárigerler gúlbaǵynyń qurylys jumystary jospar boıynsha jalǵasyp keledi. Oblys ákimdiginiń baspasóz qyzmetiniń habarlaýynsha, gúlbaq aýmaǵynda jattyǵý, oıyn alańdary men sáýlettik kompozısııalar, sondaı-aq sýburqaq ornatylady. Saıabaqta aǵash otyrǵyzylyp, avtomatty sýarý júıesi iske qosyldy.
Jaqynda ǵana Semeıdegi Baýyrjan Momyshuly men Áset Naımanbaev kósheleriniń jolaıryǵynda tarıhı qıylys ashylyp, qala turǵyndary men qonaqtaryn qyzyqtyratyn jańa orynǵa aınaldy. Bul – oblys ákimdiginiń tapsyrysy aıasynda júzege asyp otyrǵan aıtýly jobalardyń biri. Jobaǵa tarıhı ǵımarattar men sáýlet eskertkishterin jańǵyrtý, nysandardyń qundylyǵyn saqtaý maqsatynda zamanaýı materıaldardy paıdalana otyryp, olardyń bastapqy kelbetin qalpyna keltirý kózdelgen.
Atalǵan kóshelerdiń qıylysynda tarıhı eskertkishter men sáýlet kompozısııalarynyń boı túzeýi beker emes. Sebebi munda kóne qalanyń shejiresinen belgili tarıhı nysandar men sáýlet ónerinde tańdaı qaqtyratyn ǵımarattar sap quraǵan. Tarıhqa boılaýmen qatar dál osy jerde qaýipsiz ınfraqurylymǵa jol ashylyp, kólik qoljetimdiligi jaqsaryp, jaıaý júrginshilerge qolaıly aımaqtar, jaryqtandyrý, avtoturaqtar jasaldy.
«Semeıde qalamyzdyń tarıhı oqıǵalaryn baılanystyratyn taǵy bir qoǵamdyq keńistik ashylǵany jaǵymdy jańalyq boldy. Bizdiń maqsatymyz – ony jaqsy jaǵdaıda saqtaý. Bul rette «Taza Qazaqstan» baǵdarlamasy aıasyndaǵy jumystardy jalǵastyrý mańyzdy. Ekologııalyq máseleler men abattandyrý birjola sheshilmeıdi, olar únemi qoǵam nazaryn jáne kúsh salýdy talap etedi. Bul baǵdarlamanyń jalǵasýy turǵyndar arasynda ekologııalyq mádenıetke, balalardyń da, eresekterdiń de tabıǵatqa uqypty qaraýyna da jaýapkershilik júkteıdi», deıdi Semeı qalasynyń qurmetti azamaty Zeınolla Toqaev.
Oblysta boı kóterip jatqan bilim nysandarynyń qurylysy da oblys basshysynyń jiti nazarynda tur. Qaladaǵy «Qaraǵaıly» shaǵyn aýdanyndaǵy 1 200 oryndyq jańa mekteptiń qurylysy qarqyn alyp, Zarıa shaǵyn aýdanynda «KazMinerals» kompanııasymen jasalǵan memorandým aıasynda mektep jumysy jaqyn arada aıaqtalady. Qazir aınalany abattandyrý, ǵımarattardyń qasbetterin jóndeý jumysy júrgizilip jatyr. IT jáne jańa tehnologııalar joǵary kolledjinde ınjenerlik kommýnıkasııalar Smart tehnologııalar men jasandy ıntellekt elementterin qoldaný arqyly engizilip otyr. Ǵımarat aldyndaǵy aýmaqta abattandyrý júrgizilip, qosymsha LED ekran ornatyldy. «Zarıa» shaǵyn aýdanyndaǵy mektep pen IT jáne jańa tehnologııalar joǵary kolledji bolashaqta birlese jumys atqaryp, bilikti mamandar daıarlap shyǵatyn oqý ornyna aınalatyny anyq.
«Álem bilim men ǵylymǵa erekshe kóńil bólip jatqan tusta kóshten qalmaýdyń qamyn jasaǵan jón. Zamanaýı mektepter, bilim mekemelerin ashý, olarǵa bilikti ustazdardy tartý – kún tártibinen túspeıtin máselelerdiń biri. Solardyń kúshimen sanaly urpaq tárbıelep shyǵamyz degen oıdamyn. Bizdiń basty nazarymyz – áleýmettik nysandardy, demalys oryndaryn damytý jáne kólik jelisin jaqsartý. Barlyq joba turǵyndardyń ómir súrý sapasyn jaqsartýǵa baǵyttalýy kerek. Kúzdiń jańbyrly kúnderi bastalady. Sondyqtan aýa raıy qolaıly bolyp turǵanda jumysty jyldamdatý kerek», dedi oblys ákimi.
Sondaı-aq óńir basshysynyń jospary boıynsha «Qaraǵaıly» shaǵyn aýdanynda blok-modýldik qazandyq, «Soltústik» saýda ortalyǵymen aradaǵy aınalma joldyń qurylysy, magıstraldyq jylý jelileriniń aǵymdaǵy jóndeý jumystary da tekserildi.
Abaı oblysy
