Foto: Sý resýrstary jáne ırrıgasııa mınıstrligi
Kezdesýde Nurjan Nurjigitov sheteldik ınvestorlarǵa yntymaqtastyq múmkindikteri men júzege asyrýǵa bolatyn jobalardy tanystyrdy. Atap aıtqanda, Sý salasyn damytýdyń 2024-2028 jyldarǵa arnalǵan keshendi josparynda kózdelgen sý sharýashylyǵy nysandaryn salý jáne rekonstrýksııalaý jónindegi jumystar týraly aıtyp berdi.
Mınıstr sý salasyn, jerasty sýlaryn avtomattandyrý jáne sıfrlandyrý, toptyq sý qubyrlaryn qaıta jańǵyrtý jáne maman daıarlaý salasynda da birlese áreket etýdi usyndy. Sonymen qatar, taraptar Qazaq sý sharýashylyǵy ǵylymı-zertteý ınstıtýtynyń, Sý resýrstary aqparattyq-taldaý ortalyǵynyń jáne Ulttyq gıdrogeologııalyq qyzmettiń materıaldyq-tehnıkalyq bazasyn jaqsartý máselesin talqylady.
Sheteldik ınvestorlar óz kezeginde mınıstrliktiń jobalaryna qatysýǵa daıyn ekendikterin bildirip, talqylaýdy birlesken jumys toptary sheńberinde jalǵastyrýǵa kelisti.
«Biz Islam damý bankimen kelissózder hattamasyna qol qoıdyq. Osy arqyly Qazaqstannyń sý salasyna qomaqty ınvestısııa ákeletin kelisimderdi ázirleý jáne oǵan qol qoıýǵa múmkindik beretin kelesi kezeńge óttik. Memleket basshysy elimizdiń sý salasyna ınvestısııa tartýdyń mańyzyn atap ótti, sondyqtan biz halyqaralyq qarjy ınstıtýttarymen belsendi kelissóz júrgizip jatyrmyz», dedi Sý resýrstary jáne ırrıgasııa mınıstri Nurjan Nurjigitov.
