Foto: Qaraǵandy oblysy ákimdigi
«Jastar taza Qazaqstan úshin!» ekoaksııasyna 100 qala turǵyny qatysty.
«Bıyl bizdiń súıikti qalamyzǵa 70 jyl tolady. Biz, jastar, Sarandy odan da taza jáne ádemi etkimiz keledi. Qala men eldiń bolashaǵy úshin jaýapkershilikti óz moınymyzǵa alýǵa daıynbyz. Biz únemi ekoaksııalarǵa qatysamyz. Jaz boıy «Jasyl el» eńbek jasaqtary jumys istedi. Barsha turǵyndardy qorshaǵan ortanyń tazalyǵyn saqtaýǵa nemquraıdy qaramaýǵa shaqyramyz. Bolashaqta ekologııanyń jaqsy bolýy ózimizge baılanysty», deıdi Saran Jastar resýrstyq ortalyǵynyń basshysy Sándi Aqanova.
Sáýir aıynyń basynda Memleket basshysynyń bastamasymen qolǵa alynǵan «Taza Qazaqstan» respýblıkalyq aksııasyn el azamattary bir aýyzdan qoldady. Osylaısha, Saranda bul is-sharaǵa 360 ujym, 12 myńnan astam turǵyn qatysty. 14 myń tonna qaldyq shyǵaryldy. Saıabaqtar men gúlzarlar qoqystan tazartyldy, túrli aǵashtardyń 3 myńnan astam kóshetteri egildi, tarıhı jáne mádenı eskertkishterdiń mańy jınaldy.
Aımaqta ekologııalyq aksııalar odan ári jalǵasady. Mindet – oblystyń ár buryshyn qamtý, qalalar men aýyldardy taza ustaý.
