Búginde Taldyqorǵan qalasyndaǵy oblystyq kardıologııalyq ortalyq – óńirdiń ǵana emes, elimizdiń de aldyńǵy qatarly medısınalyq mekemeleriniń biri. Jyl basynan beri ortalyqta 3 myńǵa jýyq pasıent bilikti em qabyldap, operasııa jasatqan. Munda joǵary tehnologııaly qurylǵylardyń kómegimen júrek pen qan tamyrlaryna kúrdeli operasııalar jasalady.
Mamandardyń aıtýynsha, qan aınalymy júıesiniń aýrýlary álemde taralýy boıynsha 1-orynda tur, bul syrqat túrleri jyldan-jylǵa «jasaryp» keledi. Buǵan kóptegen faktor áser etedi: durys tamaqtanbaý, ekologııa, fızıkalyq belsendiliktiń bolmaýy, jaman ádetter, t.b. Osyǵan baılanysty oblystyq kardıologııalyq ortalyqta qan aınalymy júıesi aýrýlary bar naýqastar sanynyń jyl saıyn artyp otyrǵany baıqalady.
Máselen, kardıologııalyq ortalyq dırektorynyń aıtýynsha, jyl saıyn medısınalyq mekemeniń klınıkalyq-dıagnostıkalyq bólimshesine 20 myńnan astam pasıent qaralýǵa, keńes alýǵa, ÝZI jáne basqa da tekserýler úshin júginedi.
«Bizde MÁMS boıynsha tegin negizde jyl saıyn eki myńǵa jýyq koronarografııa operasııasy júrgiziledi, ıntervensııalyq kardıologııalyq bólimshede myńdaǵan pasıentke stentter ornatylady. Sonymen qatar elektrokardıostımýlıatorlardy ımplantasııalaý boıynsha 150-den astam operasııa, 120-dan astam IKD ımplantasııasy (kardıoverterdefıbrılıator), 50-den astam kúrdeli qaıta sınhrondaý qurylǵysyn ımplantasııalaý jáne júrek yrǵaǵyn qalpyna keltirýge 100-ge jýyq operasııa, 400-ge jýyq ashyq júrekke operasııa jasalady. Ashyq júrekke operasııa jasaý – bul koronarlyq arterııalardy, júrek pen qolqa qaqpaqshasyn aýystyratyn kúrdeli jáne jaýapty prosedýra. Iаǵnı Taldyqorǵanda júrek transplantasııasynan basqa barlyq operasııa jasalady. Bul rette biz jumysqa rezıdentýrada oqyp, oqýyn aıaqtaǵan dárigerlerdi ǵana qabyldaımyz», dep atap ótti oblystyq kardıologııalyq ortalyqtyń dırektory Nursan Sýrashev.
Búginde jetisýlyqtar barlyq hırýrgııalyq ıntervensııalyq kómekti Taldyqorǵanda ala alady. Aıta keteıik, keıingi jyldary ortalyqqa elimizdiń basqa qalalarynan kelgen pasıentter de jıi júgine bastady, sondaı-aq taıaý shetelderden keletin pasıentterdiń de sany artqan.
Eń qýanarlyǵy, aýyldardaǵy medısına áleýetin arttyrý jumystary da qyzý qolǵa alynyp jatyr. Bıyl oblysta ınfraqurylymdy damytý aıasynda 94 densaýlyq saqtaý nysany paıdalanýǵa beriledi. Oblystyq densaýlyq saqtaý basqarmasynyń basshysy Arman Janseńgirovtiń aıtýynsha, atalǵan 94 nysannyń 59-y «Aýyldyq densaýlyq saqtaýdy jańǵyrtý» ulttyq jobasy sheńberinde iske qosylmaq. Onyń ishinde dárigerlik ambýlatorııalar, feldsherlik-akýsherlik jáne medısınalyq pýnktter bar. Al alǵashqy medısınalyq-sanıtarlyq kómek jelisin keńeıtý maqsatynda aýyldarda 27 bloktik-modýldik nysandar ornatylady.
Solardyń qatarynda Qaratal aýdanynyń 4 aýylynda ulttyq joba aıasynda zamanaýı feldsherlik-akýsherlik pýnktterdiń qurylysy júrip jatyr. Oıan aýylynda FAP qurylysyna respýblıkalyq bıýdjetten 192,9 mln teńge, al Ortatóbe aýylyna 189,1 mln teńge, Qyzyljar eldi mekenindegi qurylysqa 186,6 mln teńge, Qanabek aýylyna 183,3 mln teńge bólingen.
«Aýyldyq densaýlyq saqtaýdy jańǵyrtý» ulttyq jobasy aıasynda aýyl turǵyndary úshin medısınalyq, sanıtarlyq kómektiń qoljetimdiligin arttyrý maqsatynda Qaratal aýdanynda alty medısınalyq mekeme salý josparlanyp otyr. Búginde tórt aýylda jumys bastaldy, olar – Oıan, Ortatóbe, Qyzyljar, Qanabek aýyldary. Jaqyn arada Donshy jáne Qarajıde eldi mekenderinde qurylys jumystary bastalady», deıdi Qaratal aýdandyq ortalyq aýrýhanasy dırektorynyń uıymdastyrý-ádistemelik jumysy jónindegi orynbasary Ilııas Jumanov.
Onyń aıtýynsha, nysandar qarasha aıynda paıdalanýǵa beriledi. Mysaly, Qaratal aýdanynda 8 densaýlyq saqtaý nysanyn salý josparlansa, sonyń 6-aýy «Aýyldyq jerlerde densaýlyq saqtaýdy jańǵyrtý» ulttyq jobasy aıasynda boı kóteredi. Atap aıtqanda, Ortatóbe, Qyzyljar, Qanabek, Oıan, Qarajıde, Donshy aýyldarynda 5 feldsherlik-akýsherlik pýnkt pen bir medpýnkt salynady. Olardyń qurylysy bıylǵy jyldyń sońyna deıin aıaqtalady.
Osy rette oblys basshysy Beıbit Isabaev ınfraqurylymdy damytý men kadrlar tapshylyǵy problemasyn sheshý medısınalyq qyzmetterdiń sapasy men qoljetimdiligin arttyrýdaǵy negizgi faktorlar ekenin jetkizdi. О́ńirdiń áleýmettik ınfraqurylymyn jaqsartý maqsatynda nysandar qurylysyna blokti-modýldi konstrýksııalardy paıdalaný turaqty qolǵa alynǵan. Bul shalǵaıdaǵy aýyldardy zamanaýı medısınalyq nysandarmen qamtamasyz ete otyryp, qurylys úderisin jedeldetýge múmkindik beredi.
«2022 jyly oblys kóleminde 12 blokti-modýldi medpýnkt salynsa, 2023 jyly osyndaı 20 nysan turǵyzyldy, bıyl taǵy 27-sin salý josparlanyp otyr. Sonyń ishinde osy jyly 2 blokti-modýldi medısınalyq pýnkt Sarybulaq pen Kishitóbe aýyldarynda ornatylady. Olardyń qurylysy qarashanyń sońyna deıin aıaqtalady. Sonymen birge «Aýyldyq jerlerde densaýlyq saqtaýdy jańǵyrtý» ulttyq jobasy aıasynda oblysta 59 nysan salý josparlansa, sonyń 6-aýy – 5 feldsherlik-akýsherlik pýnkt pen bir medpýnkt Qaratal aýdanynda turǵyzylady. Medısına mamandaryn tartý sharalary da nazardan tys qalǵan joq», dedi oblys basshysy.
Osy maqsatta bıyl oblysta dárigerlerge bir rettik ótemaqy retinde áleýmettik kómek qarastyrylyp otyr. Máselen, qalalyq jerde – 5 mln teńge, aýyldyq jerde 10 mln teńgeden beriledi. Bıyl jalpy 595 mln teńge qarastyrylǵan. Sonymen qatar Qaratal aýdanynda 2022 jyldan bastap dárigerlerge 13 páter bólingen. Jalpy páteraqy tólemi berilip, kóterme járdemaqylar tólenedi. Sondaı-aq turǵyn úı satyp alýǵa jeńildikti nesıeler berilmek. Bul úderis basqa aýdandarda da júzege asyp jatyr.
Atap ótsek, bıyl aýdanǵa úsh qajetti maman – akýsher-gınekolog, anestezıolog-reanımatolog jáne jalpy tájirıbe dárigeri kelmek. Sonymen qatar úsh jedel járdem kóligi Eskeldi bı, Kópbirlik aýyldary men Úshtóbe qalasynyń dárigerlik ambýlatorııalaryna berildi.
Jetisý oblysy
