Sýret: aqmeshit-aptalygy.kz
Jýrnalıstıka salasynda eńbek etken jyldary Otan aldyndaǵy mindetin óteýge jibergen uldarynan aıyrylyp, qara jamylǵan otbasylar kóp bolǵanyn kózimiz kórdi. Mysaly, osydan 5-6 jyl buryn áskerdegi sarbaz atylyp qaldy. Keıin ony shúrippeni baıqaýsyzda ózi basyp jibergen dep jarııalady. Bul qanshalyqty aqylǵa syıady? Kúni keshe Erbaıan esimdi baýyrymyzdyń áskerde júrip qandaı aýyr jaǵdaıǵa tap bolǵanyn búkil el kórdi. Zińgitteı jigittiń ájethana ishinde qulap, sonshalyqty aýyr dertke shaldyqqanyna kim senedi? Bul oqıǵalardyń bári áli kúnge áskerde álimjettik bar ekenin, sondaı-aq ol burynǵysha jasyrylyp, jabýly taqyryp kúıinde kele jatqanyn kórsetedi. Ony Memleket basshysynyń ózi Joldaýda aıtyp otyrǵany da beker emes. Qorǵanys mınıstrliginiń basshylyǵy men quqyq qorǵaý salasyndaǵy ózge de mekemeler buǵan jiti nazar aýdarýǵa tıis.
Eger osyndaı oqıǵalar qaıtalana berse, áskerge ketken balalarymyz árkimnen tıyn-teben surap júrse, taıaq jep, úıine múgedek bolyp oralyp jatsa, bul – júıede úlken problema bar ekeniniń aıqyn kórsetkishi. Muny toqtatý kerek. Sondaı-aq ásker salasyna úlken reforma qajet. Bul reformany sıfrlyq platforma jasaýdan bastasaq degen oıym bar. Balalarymyzdyń qaýipsizdigin tikeleı rejimde kórip otyratyn júıe kerek. Olar qolynda telefon ustamaıdy, biraq bopsalaıtyn kezde telefon tabyla qalatyny qyzyq.
Biz jastarǵa áskerge barý mindet deımiz. Shyn máninde, olar áskerge, Otandy qorǵaýǵa mindetteýmen emes, óziniń qalaýymen barýy kerek. Ol úshin biz joǵaryda atalǵan keleńsizdikterdi joıyp, tıisti jaǵdaı jasaýymyz qajet. Áskerde qaýip-qater joq ekenine olardyń ata-analarynyń da kózin jetkizgen jón. Jaýyrdy jaba toqyǵanmen, jaranyń jazylmaıtyny belgili, sondyqtan bul jaǵdaıǵa barynsha kóńil aýdarý kerek. Eger jaǵdaı osy betimen kete berse, qoǵamnyń tıisti reaksııasy bolady. Qoldan áleýmettik dúrdarazdyq týdyrmaǵan jón.
Nartaı ARALBAIULY,
Májilis depýtaty
