Jetisýda Mádenıet úıinsiz otyrǵan aýyldar bar. Sonyń biri – Qoǵaly aýyly. Talaı jyldan beri qańyrap qalǵan mádenı orda bıyl esigin qaıta ashty. Osy bir mereıli sátte Kerbulaq aýdanynyń ákimi Qanat Esbolatov sóz alyp, halyqty quttyqtady.
«Mádenıet – ulttyń máıegi, rýhanı qaınar kózi ǵana emes, ómirimizdegi negizgi salanyń biri. Biz bul salany jańǵyrtý arqyly eldiń rýhyn, ótkeni men búginin jańǵyrtamyz, uly muralardy qalyptap, tyń dúnıelerdi urpaqqa mıras etemiz. Jas órender sapaly bilim, sanaly tárbıe alyp qana qoımaı, mádenı, ádebı turǵyda da tanym kókjıegin keńeıtýge tıis. Keshegi babalardaı tarıhta atyn, sońynda izin qaldyrýy kerek. Ol úshin de áleýmetti mádenı qoldaý aýadaı qajet. Al búgin kúrdeli jóndeýden keıin ásem kelbetimen ózderińizge paıdalanýǵa berilgeli turǵan Mádenıet úıi – barshamyzdyń ıgiligimiz», dedi Q.Esbolatov.
Ákim lebizinen keıin aýdandyq máslıhat tóraǵasy Qaırat Bekeev, aýdandyq ardagerler keńesiniń tóraǵasy Bóken Rysbekov, mádenıet salasynyń ardageri Lıýdmıla Pınchına sóz alyp, ystyq yqylastaryn bildirdi. Rýhanı, mádenı turǵyda úzik-úzik tolǵamdaryn jetkizip, sońyra Mádenıet úıiniń lentasyn saltanatty túrde qıdy. О́z kezeginde kópshilik jańǵyrǵan Mádenıet úıine enip, jergilikti ónerpazdardyń konsertin tamashalady.
«Bul – erekshe kún. Mádenıet úıi el ıgiligine berildi. Osynaý rýhanı mekeme ishinde kitaphana jelisi jumys isteıdi. Onda 39 myń kitap qory bar. Jańa ashylǵan Mádenıet úıinde, sonyń ishinde kóptegen ıgi shara ótetin bolady, sol úshin qýanyshtymyn», dedi 35 jylǵa jýyq aýyl kitaphanasynyń tizginin ustap kele jatqan Raıhan Baıtaeva.
Qoǵaly aýylynyń turǵyny Kenjegúl Nursultanova: «Búgin – meniń ómirimniń sáýleli sátteriniń biri. Qoǵaly aýylyndaǵy qýanyshty oqıǵa. Mádenıet úıiniń arhıtektýralyq árlenýi aýyl ajaryn ashady. Osy mádenıet mekemesin paıdalanýǵa bergenine oblys, aýdan, aýyl ákimine, qurylysshylarǵa sheksiz alǵysymdy bildiremin», deıdi.
Aýdan ákiminiń aıtýynsha, Mádenıet úıiniń qurylysy 2020 jyly bastalǵanymen, shegine jetpeı jumys toqtaǵan. Bastapqy merdigermen kelisimshart úzilgen. Osy Mádenıet úıiniń kúrdeli jóndeý jumysy boıynsha «JetysýKazStroıServıs» JShS-men 62 mıllıon 125 myń teńgege kelisimshart jasalyp, Mádenıet úıi zamanǵa saı jańǵyryp otyr. Bıyl shalǵaıdaǵy 12 aýylǵa qajetti mádenı nysandar blokty-modýldi konstrýksııadan salyna bastady.
Aıta keteıik, jalpy turǵyndarynyń sany 1 myń adamnan aspaıtyn 12 aýylǵa blokty-modýldi klýbtar ornatýǵa oblystyq bıýdjetten 1,7 mlrd teńge qarastyrylǵan. О́tken jyly tájirıbe retinde eń alǵash Eskeldi aýdanynyń Qońyr aýylynda BMK (klýb) turǵyzylsa, bıyl oǵan qosa Alakól, Eskeldi, Qaratal, Kóksý, Kerbulaq aýdandarynyń aýyldarynda jańa úlgidegi blokty-modýldi mádenı nysandardyń qurylys jumysy júrip jatyr.
Solardyń biri Kerbulaq aýdany Shubar aýylynda ornatylýda. Qazirgi tańda nysandaǵy qurylys jumystarynyń shamamen 40 % aıaqtalǵan.
«Metall konstrýksııalaryn quryp bitirgen soń sendvıch panelmen qaptaımyz. Sodan soń syrtqy jumysyna kirisemiz. Klýbtyń 120 oryndyq kórermen zaly, 11 bólmesi bolady. Qurylys jumystarynyń kestesine saı alda eki aı ýaqytymyz bar, belgilengen merzimde aıaqtaýdy josparlap otyrmyz», deıdi merdiger «Aqtóbe ekort» JShS proraby Birlik Qantbaev.
Eldi mekende mádenıet oshaǵynyń salynatynyna aýyl turǵyndary qýanyp júr.
«Aýylymyzda osyndaı jańa nysan salynyp jatqanyna rızamyz. Balabaqsha, mektebimiz bar. Endi mádenıet oshaǵy ashylsa, jastardyń bos ýaqytyn paıdaly ótkizýine jaqsy múmkindik týady. О́zimiz de bir mezgil konsert kórsek, mereke ótkizsek, syrttan keletin ártisterdiń oıynyn tamashalasaq, aýyl turǵyndaryna da rýhanı demalatyn oryn bolar edi», deıdi aýyldyq Analar keńesiniń tóraǵasy Núketaı Kúzenbaeva.
Jalpy, Jetisý oblysynda 200-den astam mádenıet nysany halyqqa qyzmet kórsetedi. Oblys qurylǵaly beri 7 jańa mádenıet nysany ashyldy, sonyń 5-eýi – mádenıet úıi, 1 mýzeı, 1 kitaphana.
Jetisý oblysy
