Senat komıtetiniń tóraǵasy Nurtóre Júsip 2024 jylǵy Joldaý Prezıdenttiń aldyńǵy Joldaýlary men saılaýaldy tuǵyrnamasyna engizilgen reformalar baǵytynyń jalǵasy ekenin atap ótti. Senator óz sózinde Prezıdent azamattardyń ómir súrý sapasyn jaqsartý jónindegi júıeli ekonomıkalyq ózgeristerge nazar aýdarǵanyn jetkizdi. Memleket basshysy aıqyndaǵan barlyq toǵyz basym baǵyt osy negizgi mindetti sheshýdi kózdeıdi.
«Memleket basshysynyń Joldaýynda júzge jýyq bastama men usynys qamtylǵan. Sonyń eń mańyzdysynyń biri – AES qurylysy týraly jalpyhalyqtyq referendým ótkizý kúnin belgileý – qoǵamda kópten beri aıtylyp kele jatqan taqyryp. Referendým «Halyq únine qulaq asatyn memleket» tujyrymdamasy men Ádiletti Qazaqstan ıdeıasynyń taǵy bir naqty kórinisi bolmaq. Memleket basshysy ınternet-alaıaqtyq, áskerdegi tártip, esirtki bıznesine qarsy kúres, pedagog jáne medısına kadrlarynyń jetispeýshiligi sııaqty qoǵamdy alańdatatyn birqatar ózekti máselelerge de erekshe nazar aýdardy. Jasandy ıntellekti damytý jáne osy tehnologııalardy Qazaqstannyń sıfrlyq platformasyna engizý de Joldaýdyń mańyzdy kezeńi, bul óz kezeginde sıfrlyq tehnologııalar belsendi qoldanylatyn jáne damyǵan elge aınalýǵa kómektesedi. Jalpy, Joldaý ózekti máselelerdi sheshýge jáne elimizdiń strategııalyq damý maqsattaryna qol jetkizýge baǵyttalǵan. Biz depýtattyq korpýs retinde Prezıdenttiń barlyq tapsyrmalarynyń oryndalýyn zańnamalyq turǵydan jan-jaqty qamtamasyz etýge mindettimiz», dedi Nurtóre Júsip.
Sonymen qatar, Nazarbayev University alańynda ótken jıynǵa qatysýshylar Memleket basshysynyń el óńirleriniń áleýmettik-ekonomıkalyq damýy salasyndaǵy tapsyrmalaryn júzege asyrý máselelerin de talqylady.
