Sýretti túsirgen – Jeńis YSQABAI
Buǵan deıin Kerbulaq, Panfılov aýdandarynda dál osyndaı turǵyn úıler elge tabystalǵan edi. Endi sol ıgilikti istiń jalǵasy retinde Úsharal qalasynda 60 páterli kópqabatty turǵyn úıdiń kilti turǵyn úı kezeginde turǵan aýdan azamattaryna berildi. Zamanaýı úlgide boı kótergen baspananyń qurylys jumystaryn aýdandyq qurylys, sáýlet jáne qala qurylysy bóliminiń tapsyrysy negizinde merdiger «Qaınar AKB» JShS júrgizdi.
Jalpy, aýdanda turǵyn úı kezeginde 4 sanat boıynsha 1653 azamat tirkelgen. 5 qabattan turatyn 60 páterli jaldamaly turǵyn úıde bir 30 bólmeli, 15 eki bólmeli, 15 úsh bólmeli páter bar. Baspanaly bolý baqytyna ıe bolǵan aýdan turǵyny, kópbalaly ana Gúlaıym Shákenova oblys ákimdigine alǵysyn bildirdi.
«Turǵyn úı kezeginde turǵanyma 5 jyldan astam ýaqyt boldy. 5 balammen sapasy nasharlaý jaldamaly úılerde turyp keldik. Mine, búgin turǵyn úı kezegimen jeke jańa, zamanaýı turǵyn úıdiń kiltin ıelenip jatyrmyz. Qýanyshymyzda shek joq. Barsha jańa qonys ıelerin quttyqtaımyn. Aýdanymyz damı bersin. Qonystoıyn toılap jatqan turǵyndardyń arasynda otbasylyq ómirge jańa aıaq basqandar da, zeınet jastaǵy qarııalar da bar. Endigi maqsat – páter ishin toltyryp, táýelsiz elde baqýatty kún keshý», dedi G.Shákenova.
Páter kiltterine ıe bolǵandardyń basym bóligi – áleýmettik jaǵynan az qamtylǵan, jyldar boıy páter kezeginde turǵan otbasylar. Jyl sanap damyp kele jatqan Alakól aýdanyndaǵy turǵyn úı máselesi oń turǵyda sheshilip jatyr.
Aıta keteıik, aýdan halqynyń áleýmettik ahýalyn jaqsartý, turǵyn úımen qamtamasyz etý maqsatynda turǵyn úı kezeginde turǵan halyqtyń áleýmettik osal toptaryndaǵy aýdan turǵyndaryna 60 úı, Qabanbaı aýylynda jas mamandarǵa arnalǵan 10 jeke turǵyn úıdiń qurylys jumysy bastalyp, jyl sońyna deıin qoldanysqa berý josparlanyp otyr. Osylaısha, óńirde qonystoıyn toılaýshylar sany artpaq. Otbasylardy turǵyn úımen qoldaýdyń keshendi modeli áli de jalǵasady.
Bıyl jalpy alǵanda oblysta 4 myńnan astam otbasy qonystoıyn toılaıdy. Atap aıtqanda, jalgerlik – 678, jeńildetilgen nesıelik – 1802, «Jetisý jastary» baǵdarlamasymen – 50, «Jeruıyq» baǵdarlamasymen – 66, apatty turǵyn úı ıelerine – 95, halyqtyń áleýmettik osal toptaryna jalgerlik turǵyn úı satyp alýǵa – 866, demeýshiler esebinen 560 úı beriledi.
Bul rette, ásirese Taldyqorǵan qalasynda turǵyn úı máselesi ózekti sanalady. Búginde oblys ortalyǵynda 15 myńnan astam adam turǵyn úı kezeginde tur. Kezektegi azamattardy baspanamen qamtý isin ilgeriletý maqsatynda qurylys qarqyny jyl saıyn artyp keledi.
Taldyqorǵan qalalyq ákimdiginiń málimetine súıensek, bıyl bıýdjet qarjysy esebinen Taldyqorǵanda 56,8 myń sharshy metr turǵyn úıdi paıdalanýǵa berý josparlanǵan. Atap aıtqanda, 108 páterlik 4 úı jalgerlik, 590 páterlik 17 úı nesıelik bolmaq. Solardyń ishinde qalanyń 9-shaǵyn aýdanyndaǵy bes, jeti jáne toǵyz qabatty jalpy sany 89 páterlik úıdiń búginde qurylys jumystary 90% aıaqtalǵan.
– Qurylys jumysynyń jalpy quny – 1 mlrd 778 mln teńge. Turǵyn úıdi salý barysynda otandyq qurylys materıaldary paıdalanyldy. Bul úılerde bir, eki jáne úsh bólmeli páterler bar. Qazirgi kezde lınoleým tóseý, ishki árleý jumysy júrgizilip jatyr. Nysandy qyrkúıek aıyna tapsyrý josparlanǵan, sodan keıin jańa shaǵyn aýdandy tutas qamtı otyryp, abattandyrý jumystary bastalady, – dedi Taldyqorǵan qalalyq qurylys bóliminiń bas mamany Marlan Qalıev.
О́tken jyly turǵyn úıdi paıdalanýǵa berý Taldyqorǵanda rekordtyq kórsetkishke jetken. Sonyń arqasynda kezekte turǵandardyń shamamen 12-13%-y baspanaǵa ıe boldy. Al oblys boıynsha 2022-2023 jyldary memlekettiń qoldaýymen, demeýshilerdiń kómegimen 2100-den astam otbasy turǵyn úıge ıe boldy, sonyń ishinde 700-i kópbalaly, 751-i áleýmettik osal topqa jatatyn otbasy, 100-i – jetim bala sanatyndaǵylar.
Jalpy, bıyl Jetisý oblysynda 349,3 myń sharshy metr turǵyn úıdi paıdalanýǵa berý josparlanyp otyr. Bul 2023 jylǵy deńgeıden 8,2%-ǵa artyq, sonyń ishinde 1175 páterli, aýmaǵy 99 myń sharshy metr bolatyn 37 úı bıýdjet esebinen iske qosylady. Eske sala ketelik, osy jyldyń 7 aıynda óńirde 134 myń sharshy metr turǵyn úı paıdalanýǵa berilgen.
Jetisý oblysy
