Sýretti túsirgen – Erlan OMAR, «EQ»
Teńge ilý sportynyń «Qos qulash» dep atalatyn synynda Rahat Qambarov qos saıystyń qorytyndysy boıynsha qarsylas shaq keltirmedi. Ol alǵashqy kezeńde jarys jolynyń oń jáne sol jaq qaptalyna qoıylǵan tórt teńgeni belgilengen ýaqytta túgel ildi. Osylaısha, otandasymyz oıynnyń alǵashqy kezeńinen-aq qarsylastaryn qapyda qaldyrýǵa tyrysty. Bul kezeńde otandasymyz 8 upaı enshilep, kósh bastasa, Qyrǵyzstan sportshysy 6 upaıdy oljalap, myqtylyǵyn baıqatty. Á degennen úzdik úshtikke ilesken Mońǵolııa óreni Mels Naýryzbektiń enshisinde 4 upaı boldy. Bul kezeńde О́zbekstan myqtysy Zokırjon Azızbekov te 3 upaı alyp, júldeden úmitti ekenin baıqatqan. Alaıda alǵashqy úshtiktiń qarymy ekinshi kezeńde de basym boldy.
Fınaldyq básekede sportshylar oń jáne sol qolmen úsh-úsh teńgeden alty teńgeni ilýge talpyndy. Rahat Qambarov bul kezeńde de 6 teńgeni ońaı qaǵyp alyp, jeńimpaz atandy. Al Rahattyń basty qarsylastarynan mońǵol sportshysy Mels Naýryzbek ekinshi oryndy jeńip alsa, qyrǵyzdyń myqtysy Ashat Talaıbekov úshinshi oryn aldy. Rahat Qambarov – Túrkistan oblysynyń týmasy. Teńge ilýden eldiń birneshe dúrkin chempıony, Azııa kýboginiń jeńimpazy. Kóshpeliler oıyndarynda Rahattyń astyndaǵy sáıgúligi de jer tarpyp, teńge ilý sportyna ábden mashyqtanǵany kórinip turdy.
Teńge ilýden qorjynǵa ekinshi altyndy Beknur Serikov saldy. Beknur etnoaýylda ótken básekede Teńge ilýdiń «Bes beles» synynda óner kórsetip, qarsylastarynan epti ári shapshań ekenin dáleldedi. Al ekinshi oryndy qyrǵyz sportshysy Ádilbek Kenjebekuly alsa, úshinshi oryndy Rýmynııa ókili Bakos Ksongor enshiledi.
Beknur jarys erejesine saı ilgen teńgesi jaǵynan da, ýaqyt jaǵynan da úzdik óner kórsetti. Ol jarys alańyna tórt márte shyǵyp, alǵashynda berilgen eki múmkindiktiń birinde 10 teńgeniń segizin, ekinshide jeteýin ildi. Fınalda 14 teńgeniń 12-sin, ekinshi múmkindikte 11-in ildi. Erejege saı, teńgelerdi ilýge 35 sekýnd berilse, Beknur teńgelerdi 33 sekýndtan asyrmaı qaǵyp otyrdy.
