Sýret: primeminister.kz
Jıynda turǵyn úı-kommýnaldyq sharýashylyq, avtomobıl joldary, densaýlyq saqtaý, bilim berý jáne sport nysandaryn salý máseleleri talqylandy. Qala quramyna shaǵyn aýdandarǵa aınaldyrylǵan 12 eldi meken kirdi, Alataýdyń bas jospary bekitildi. Ortalyq memlekettik organdardyń aýmaqtyq organdary quryldy. Jalpy aýdany 88 myń gektardy quraıdy. Halyq sany 54 myńǵa jýyqtaıdy.
Alataý qalasynyń ákimi Árken О́tenov búginde qalada logıstıka, medısına jáne tamaq ónimderin óndirý salasyndaǵy jobalar iske asyrylyp jatqanyn baıandady. 6 myńnan asa jumys ornyn ashatyn 12 ınvestısııalyq joba úshin jer ýchaskelerin arnaıy ekonomıkalyq aımaqtyń qaramaǵyna berý josparlanyp otyr. Sondaı-aq 5,8 myń gektar aýmaqta negizgi iri jobalar ornalasady. Olardy qurý jáne ınvestorlardy tartý úshin birqatar rásimniń merzimin qysqartý qajet.
Q.Bozymbaev baıandamalardy tyńdap, Alataýdyń damýy Memleket basshysynyń erekshe baqylaýynda ekenin atap ótti. Mınıstrlikterdiń, jergilikti atqarýshy organdar men kásipkerlerdiń qatysýymen Úkimet janynan Jobalyq keńse qurýdy tapsyrdy. Ol Alataýdyń ómir-tynysy men jumys úshin ınvestısııalardy tartýǵa jaǵdaı jasaý boıynsha máselelerdi júıeli negizde sheship otyrmaq.
Vıse-premer jobalaý-smetalyq qujattamany, salalyq ınfraqurylymdyq shemalardy ázirleýdi jedeldetýdi tapsyrdy. 10 jumys kúni ishinde ákimdik ınvestorlardy tarta otyryp, damý jobalaryn (zaýyttar, fabrıkalar, áleýmettik jáne obektiler) anyqtap, kelesi jyly olardy qajetti ınjenerlik-kommýnıkasııalyq ınfraqurylymmen qamtamasyz etýge tıis.
