Qoǵamdyq keńes jemqorlyqpen kúreske atsalysady

Keńes quramyna Parlament Májili­si­niń depýtattary – Marat Báshimov, Nıkolaı Arsıýtın, Aıdos Sarym, son­­daı-aq Beıbit Mamraev, Dıhan Qamzabek­uly, Kákimjan Bıshmanov, Aınur Sabı­tova, Mels Semgalıev, Erbol Ústemi­rov, Serik Sápıev, Ǵanı Nyǵmetov, Mıhaıl Kolomın syndy qoǵam qaırat­kerleri men ǵalymdar kirdi.

Otyrysta Qoǵamdyq keńestiń tóraǵasy bolyp ashyq daýys berý arqyly biraýyzdan Marat Báshimov qaıta saılandy.

Sybaılas jemqorlyqqa qarsy qyzmet basshysy Ashat Jumaǵalı óz sózinde agenttik jumysy tıimdiliginiń negizgi kórsetkishi azamattardyń senim deńgeıi ekenin jáne buǵan qoǵammen belsendi ózara is-qımyl arqyly ǵana qol jetkizýge bolatynyn atap ótti.

«Jemqorlyqqa qarsy mańyzdy bas­tamalar qoǵamdyq keńes múshelerimen talqylanady. Keńes zańnamany jetil­dirý boıynsha usynystar engizýge, stra­tegııalyq qujattardy talqylaýǵa qa­ty­sýǵa, agenttiktiń jumysyna monıtorıng pen baǵalaý júrgizýge, sondaı-aq ony odan ári jaqsartý úshin usynymdar ázirleýge quqyly», dedi A.Jumaǵalı.

Qoǵamdyq keńester jemqorlyqqa qar­sy saıasatty iske asyrý úderisinde mańyzdy ról atqarady. Olardyń yq­paly men ókilettigi jyl saıyn artyp keledi. Keńes músheleri úkimettik emes uıym­dardyń, buqaralyq aqparat qural­darynyń jáne ǵylymı toptardyń sarap­shylaryn tarta otyryp, ózekti másele­lerdi zertteý úshin jumys toptaryn qura alady.

Qoǵamdyq keńestiń jańadan saılan­ǵan tóraǵasy Marat Báshimov áriptesterine senim bildirgeni úshin alǵys aıtyp, eldiń jemqorlyqqa qarsy saıasatyn jaq­sartý baǵytynda belsendi jumysty jalǵas­tyrýǵa daıyn ekenin bildirdi.

Otyrysty qorytyndylaı kele, Ashat Jumaǵalı qatysýshylarǵa alǵys bildi­rip, jemqorlyqqa qarsy is-qımyldy kúsheı­týge baǵyttalǵan jańa bastamalardy ázirleýde sáttilik tiledi.